सीता दाहालको पशुपतिमा अन्त्येष्टि
काठमाडौं, 12 जुलाई 2023
प्रधानमन्त्री पुष्पकमल दाहाल प्रचण्डकी पत्नी सीता दाहालको शव पशुपति आर्यघाटमा लगिएको छ । सीता दाहालको राजकीय सम्मानका साथ पशुपति आर्यघाटमा अन्त्येष्टि गरिएको छ ।
उनलाई पति पुष्पकमल दाहाल प्रचण्ड र दुई छोरी रेणु र गंगाले दागबत्ती दिएका हुन् । उनको शवलाई अन्त्येष्टिका लागि पशुपति आर्यघाट लैजानुअघि नेकपा माओवादी केन्द्रको पार्टी कार्यालय पेरिसडाँडामा राखिएको थियो ।
त्यहाँ विभिन्न राजनीतिक दलका नेता तथा उनका शुभचिन्तकहरुले श्रद्धाञ्जली दिएका थिए । दाहालको बुधबार बिहान ८:३३ बजे काठमाडौंको नर्भिक अस्पतालमा निधन भएको थियो ।
सीताको निधन भएपछि बसेको मन्त्रिपरिषदको बैठकले उनको राजकीय सम्मानका साथ अन्त्येष्टी गर्ने निर्णय गरेको थियो । जस अनुसार उनको राजकीय सम्मानका साथ अन्त्येष्टि गरिएको हो ।
