‘अखण्ड भारत’ नक्साबारे कूटनीतिक नोट पठाउन एमालेको माग
काठमाडौं, 15 जुन 2023
भारतले आफ्नो नयाँ संसदमा भवनमा राखेको ‘अखण्ड भारत’को नक्साको विरोधमा कूटनीतिक नोट पठाउन प्रमुख प्रतिपक्षी दल नेकपा एमालेले माग गरेको छ । बिहीबार बसेको प्रतिनिधिसभा बैठकमा बोल्दै एमाले सांसद रघुजी पन्तले नेपालको भू–भाग समेटेको ‘अखण्ड भारत’को नक्साको विरोधमा नेपाल सरकारले तत्काल कूटनीतिक नोट पठाउन माग गरेका हुन् ।
भारतलाई कूटनीतिक नोट पठाएर संसदलाई जानकारी गराउन समेत उनले माग गरे । हालै भारतले आफ्नो नयाँ संसदमा भवनमा राखेको ‘अखण्ड भारत’को नक्सामा नेपालको लुम्बिनी, कपिलवस्तु, विराटनगर समेटिएको छ । उनले नक्साका बारेमा भारतीय विदेशमन्त्री र अन्य मन्त्रीहरूको अभिव्यक्ति फरकफरक आएको समेत बताए।
नक्साबारे भारतीय विदेशमन्त्री एस जयशंकरले छिमेकी मुलुक नेपालले बुझेको भन्ने अभिव्यक्ति दिएको र अर्को मन्त्रीले सामाजिक सञ्जालमा नक्सा राखेर ‘संकल्प अखण्ड भारत’ लेखेको बताउँदै सरकारले यसबारेमा स्पष्ट पार्नुपर्ने बताए।
‘के सरकारले चित्त बुझाएको हो?’ उनले सोधे।
पन्तले सीमा समाधानबारे भारतीय प्रधानमन्त्रीसँग भएको कुराकानीको विषय प्रधानमन्त्री पुष्पकमल दाहालले सदनलाई ढाँटेको बताए।
उनले संसदमा एउटा भनेको तर पत्रकारहरूसँग अर्कै कुरा भनेकोले सरकारले स्पष्ट जवाफ दिनुपर्ने बताए।
संचार माध्यममा भारतस्थित नेपाली राजदूत शंकर शर्माले नेपाललाई हिन्दु राष्ट्रको रूपमा वकालत गर्न खोजेको, बीआरआइ र इपिजीका बारेमा विवादास्पद अभिव्यक्ति दिएको बताए। ‘इपिजी प्रतिवेदनबारे राजदूतले बोकेको बिचारले नेपालको प्रतिनिधिनत्व गर्छ? सरकारको दृष्टिकोण हिन्दु राष्ट्रको नारालाई प्रोत्साहन दिने हो? धर्मनिरपेक्षताबारे नेपाल सरकारको दृष्टिकोण के हो? बिआरआईबारे राजदूतले भनेकै कुरा हो सरकारको धारणा?’ उनले सोधे।
यी सबै विषयमा सरकारले संसदलाई प्रष्ट पार्नुपर्ने उनले बताए। ‘प्रधानमन्त्रीले स्पष्ट नपारे थप पाइला चाल्नुपर्ने हुन्छ,‘ उनले भने।
यो समाचार पनि पढनुहोस्…