नयाँ दिल्ली डेस्क, 14 मार्च 2020
अमेरिकी राष्ट्रपति डोनल्ड ट्रम्पले कोरोना भाईरस (कोभिड–19) को संक्रमण बढ्दै गएपछि राष्ट्रिय संकटकालको घोषणा गर्नुभएको छ। शुक्रबार वाशिङ्टन डीसी-स्थित ह्वाइट हाउसबाट उहाँले राष्ट्रिय संकटकालको घोषणा गर्नुभएको हो।
राष्ट्रपति ट्रम्पले कोरोना भाईरस रोकथामका लागि अमेरिकी सरकार मिहेनतका साथ लडिरहेको बताउनुभयो। अहिलेसम्म अमेरिकामा कोरोना भाईरसबाट 2 हजार 4 सय 66 जना संक्रमित र 50 जनाको मृत्यु भएको छ।
यसैबीच क्यालिर्फोर्नियास्थित ठूला आईटी कम्पनीहरु एप्पल, फेसबुक, गुगललगायतले आफ्ना कर्मचारीलाई घरबाट काम गर्न निर्देशन दिएका छन्। कसैले कार्यालय आउनै चाहेको खण्डमा उसले सम्पूर्ण स्वास्थ्य जाँच गरेर मात्र जान पाउने व्यवस्था गरिएको बताइएको छ। ‘कम्पनीको भर्चुअल प्राइभेट नेटवर्क’ प्रयोग गरेर घरबाट काम गर्न सकिनेछ। कम्पनीका धेरैजसो बैठकसमेत त्यसरी नै भइरहेका छन्। घरबाट काम गर्न नमिल्ने कर्मचारीलाई पनि तलब सुविधा दिएर छुट्टी दिइएको छ। यस क्षेत्रका विद्यालयहरु 3 साताको लागि बन्द गरिएको छ। सपिङ मलहरुमा भने सर्वसाधारणको एकाएक भीड बढेको छ।
