असारे विकासको बिकल्प खोज्न जरूरी छ : प्रधानमन्त्री
काठमाडौं, 19 जुलाई 2023
प्रधानमन्त्री पुष्पकमल दाहाल प्रचण्डले असारे विकासको विकल्प खोज्न आवश्यक भएको बताएका छन्। विकास बजेटको ठूलो हिस्सा आर्थिक वर्षको अन्त्यमा खर्च गर्ने प्रवृत्ति रहेको उल्लेख गर्दै उनले त्यसलाई बदल्नुपर्ने बताए।आज बिहान काठमाडौँमा आयोजित नेपाल इन्जिनियर्स एशोसिएसनको ६१ औं वार्षिकोत्सव कार्यक्रमलाई सम्बोधन गर्दै प्रधानमन्त्रीले उक्त कुरा बताएका हुन् ।
उनले भने, ‘‘बनेका पूर्वाधार संरचना पनि नटिक्ने र दुर्लभ स्रोतको पनि सदुपयोग नहुने असारे विकासको प्रवृत्तिलाई त्याग्नैपर्दछ। विकासमा प्रत्यक्ष संलग्न रहनुभएका इञ्जिनियरहरूले हरेक वर्ष ल्याइने बजेटमा उल्लेख भएका विकास आयोजनाहरू समयमा नै सुरू गरेर समयमा नै निर्धारित बजेटको सीमाभित्र रहेर गुणस्तरीय रूपमा सम्पन्न गर्ने उपायको खोजीको पहल गर्नुहुने मैले विश्वास गरेको छु।’’
सरकार सामाजिक न्याय, सुशासन र समृद्धिको प्राथमिकतासहित बदलिएको व्यवस्थाअनुसार जनताको अवस्था बदल्न प्रतिबद्ध रहेको प्रधानमन्त्रीको भनाइ छ। सुशासनको लक्ष्य हासिल गर्न सरकारले भ्रष्टाचारविरोधी अभियानलाई तिब्रताका साथ अघि बढाइरहेको उनले उल्लेख गरे।
