विराटनगर, 6 दिसम्बर 2022
नेपाली कांग्रेसका नेता डा. शेखर कोइरालाले गठबन्धनकै सरकार बन्ने बताएका छन् ।
विराटनगरमा मंगलबार कांग्रेस नेता गुरूराज घिमिरेले लेखेको ‘बाटो विराएको राजनीति’ नामक विचार संग्रह विमोचन गर्दै कोइरालाले भने ‘गठबन्धनकै सरकार बन्छ, यसमा कुनै चिन्ता गर्न आश्यक देख्दिनँ । त्यो सरकारले तपाई हामीले खोजेको जस्तो काम गर्न सक्छ कि सक्दैन ? यसमा चुनौती छ ।’
उनले पपुलर मत घट्नुको कारणबारे गम्भीर हुनुपर्ने पनि बताएका ।
‘यसपटक २३ बाट ५७ सिटमा त कांग्रेस पुग्यो तर पपुलर मत ७ प्रतिशत किन कम भयो?’, कोइरालाले भने, ‘यसबारे गम्भीर हुन जरूरी छ। कांग्रेसको साख गिरेको हो कि भन्नेछ। यसलाई सच्याएर अघि बढनुपर्छ।’
उनले कांग्रेसको साख गिर्न नदिन मुलुकमा सुशासन दिनका साथै भ्रष्टाचार र दण्डहीनताको अन्त्य गरेरै छाड्ने बताए । उनले युवाहरूलाई सही बाटोमा हिँड्न आग्रह गरे । विचारमा आबद्धहरू एक ठाउँ बस्ने गरेको तर विभाजन भएपछि अवसरवादीहरूले ठाउँ पाउने गरेकाले पार्टीलाई एकढिक्का बनाउने कोइरालाले प्रतिबद्धता जनाए ।
