काठमाडौं, 30 अक्तूबर 2021
नेकपा एमाले संसदीय दलका उपनेता सुवासचन्द्र नेम्वाङले आफुहरुको बिरोधकाबीच एक सेकेण्डपनि सदनको कामकारवाही नरोकिएको स्पष्ट पार्नुभएको छ । शनिबार संसद भवन नयाँ बानेश्वरमा बसेको एमाले संसदीय दलको बैठकमा नेम्वाङले एमालेको कारण सदनको काम कारवाही रोकियो भन्ने प्रचार निरर्थक रहेको भन्दै आफ्ना कारणले एक सेकेण्डपनि सदनको कामकारवाही नरोकिएको स्पष्ट पार्नुभएको हो । नेम्वाङले सरकारले नै कुनै बिधेयक नल्याएर सदनका कामबिहिन बनाएको आरोप लगाउनुभयो । उहाले सरकारले बिजनेश नदिएका कारण नै सदनले सिन्का भाच्न नसकेको तर्क गर्नुभयो । नेम्वाङले सदन सञ्चालनमा सभामुखले एमालेप्रति भेदभाव गरेको र कार्यव्यवस्थामा पनि एमालेसंग कुनै छलफल नै नभएको जिकिर गर्नुभयो । नेम्वाङले ८८ दिनपछि मात्र पूर्णता पाएको वर्तमान सरकारले जनता र देशप्रति कुनै काम गर्न नसकेको धारणा राख्नुभयो । नेम्वाङले सदनमा पेश भएका बिधेयक फिर्ता लिएर पछिल्लो समय सरकार उल्टोबाटोमा हिडेको तर्क गर्नुभयो । उहाले अहिले मुलुक एमालेमय भएको भन्दै ढुक्क भएर जनताको माझ जान सांसदहरुलाई सुझाव दिनुभयो । बैठकमा एमाले अध्यक्ष एवं एमाले संसदीय दलका नेता केपी शर्मा ओली भने अनुपस्थीत हुनुभएको थियो ।
