झुसिल्किरा पुतली हुने प्रक्रिया प्रकृति नै त हो
पुतली बनेर झुसिल्किरा उधारो जीवन बाँचिरहन्छ
नाचिरहन्छ, प्रकृतिमा शोभा बढाइरहन्छ
त्यसैले संकेत गर्दछ जीवन अझै बाँकी नै छ ….
जीवनबाट केही पल उधारो लिएरै बाँचियो –
श्वास पनि उधारो, शरीर पनि उधारै लिएकै त हो
सम्बन्धहरु त झन उधारो नै हुन् ….
अतीतका सुमधुर पलहरु
आइरहन्छन् स्मृतिमा छायाँ बनेर
जीवन तिनले पनि त कहाँ पो जिए र ?
जसलाई जीन्दगीले प्रेमको व्यापारी बनाइदियो ….
अझै पनि –
सुन्दरता आँखा अगाडिबाट लम्किन्छ
मतिर पुलुक्क हेर्दै
म मुस्काउँदै बाटो देखाइदिन्छु …
छातीको फोक्सो बाफिएर
मुटुमा मुटु घोटिएर
हृदयमा परेको चट्याङ सहेर
ऐया… नभनी पीडा सहेरै उधारो हाँसो हाँस्दै
जीवनको संग्राममा हुँदा पनि
उधारो नै सही मुस्कानले पीडा ढाकेर
प्रेमको कथा कोर्नेहरुलाई कोटी प्रणाम छ ….
सपना उधारो
विपना त झनै उधारो
स्मृतिका छालहरु छचल्किन्छन् –
हाँसो त छँदै थियो
आँशु पनि उधारो
हुँदा हुँदा जीवन नै उधारो बनिदियो
धेरै उधारोमध्ये केही उधारो तिर्न बाँकी नै छ
उधारो बाँकी भएकैले त
जीवन पनि बाँकी नै छ नि ….
उधारो नै सही
केही कथा छाडेर जाउँ
केही सपना बुनेर जाउँ –
त्यसैले पनि आजै आँखा बन्द गर्न मन छैन
प्रकृतिबाट आउने सुमधुर संगीत सुन्नै बाँकी छ
मौनताको मधुर ध्वनि,
मौनताकै सुमधुर आवाज घन्काएर
हृदयको उच्छवाससँगै आनन्दपूर्वक नाच्न बाँकी नै छ ….