नयाँ दिल्ली, 8 जुन 2020, खुम गुरुङ
दुवै मृगौलामा समस्या भएका एक नेपालीलाई दिल्लीका विभिन्न संगठनहरुले बचाउने प्रयास गरेपनि अन्ततः उनको निधन कोरोना संक्रमणका कारण भएको छ । भारतको राजधानी दिल्ली नजिक उत्तर प्रदेशको नोएडामा काम गर्दै आएका स्याङ्जा वालिङ-3 माझकोट छार्पाका 58 वर्षीय हर्कबहादुर गुरुङको मृत्यु कोरोना संक्रमणका कारण भएको पुष्टी भएको छ ।
पछिल्लो केही समयदेखि मृगौलाको समस्याले ग्रस्त हर्कबहादुरलाई लकडाउनका कारण समस्या थपिएपछि सितारियो कराते डु एशोसिएशनका कोम थापा र यम थापा, प्रवासी नेपाली जनसमाज भारत र समाजसेवी दिलबहादुर थापाले उपचारमा सहयोग गर्दै आएका थिए । यसक्रममा गुरुङ समाजले उनिहरुको खाना पिउने व्यवस्था गरिरहेका थिए । तर लकडाउनका कारण उपचारमा असहज भएपछि अखिल भारत नेपाली एकता मञ्चको नोएडा नगर समितिका नारायण बिष्टको पहलमा उनलाई गए सातामात्रै नेपाल पठाइएको थियो । हर्क बहादुर र उनकी श्रीमतिलाई वालिङ -3 का वडा अध्यक्ष सुकराज गुरुङको पहलमा गत जेठ 22 गते सुनौली नाकाबाट छुट्टै गाडीको व्यवस्था गरि वालिङ लगिएको थियो । त्यसपछि कोरोना संक्रमणका कारण उनलाई गण्डकी प्रदेश पोखरा स्वास्थ्य विज्ञान प्रतिष्ठानको आइसोलेशनमा भर्ना गरिएको थियो । जहाँ उनको मृत्यु भएको हो । कोरोना भाईरसका कारण ज्यान गुमाउने उनि प्रदेशमा पहिलो व्यक्ति हुन । योसँगै कोरोनाका कारण नेपालमा ज्यान गुमाउनेको संख्या 14 पुगेको छ ।
