रुपन्देही, 18 अक्टूबर 2022
गृहमन्त्री बालकृष्ण खाँणले उपयुक्त विकल्प र व्यवस्थापनबिना सुकुम्बासी नागरिकहरूका घर–टहरा भत्काउन नहुने बताएका छन्। रुपन्देही- ३ बाट पाँच दलीय गठबन्धनका प्रतिनिधि सभा सदस्यका उम्मेदवार रहेका नेपाली कांग्रेसका केन्द्रीय सदस्य खाँणले बुटवल उपमहानगरपालिका – १६ मा चुनाव प्रचार-प्रसार कार्यालयको उद्घाटन गर्दै सुकुम्बासीहरूलाई उचित व्यवस्थापन गर्नुपर्ने बताए।
‘अहिले जस्तो अवस्थामा बसेका छन्, उनीहरू त्यस्तै अवस्थामा बस्न पाउनुपर्छ।’ रुपन्देही- ३ बाट प्रतिनिधि सभा सदस्यका उम्मेदवार रहेका खाणले भने, ‘उनीहरूलाई बसोबास गरेको स्थानबाट सार्नै पर्ने अवस्था आएमा उपयुक्त विकल्प दिएर, त्यो विकल्पमा व्यवस्थापन गरेर मात्रै सार्नुपर्छ।’
उनले आफूले गृह प्रशासनलाई घर टहरा भत्काउने अन्य सरकारी निकायको कार्यमा सहभागी नहुन निर्देशन दिइसकेको बताए।
