काठमाडौं, 23 मार्च 2022
प्रमुख प्रतिपक्षी नेकपा एमालेको केन्द्रीय कमिटी बैठकमा पार्टी अध्यक्ष केपी शर्मा ओलीले राजनीतिक प्रतिवेदन पेश गर्नुभएको छ । बुधबार काठमाडौंमा बसेको केन्द्रीय कमिटीको पहिलो दिन अध्यक्ष ओलीले अहिलेको अवस्थामा पार्टीको दृष्टिकोणसहितको राजनीतिक प्रतिवेदन पेश गर्नुभएको एमाले प्रचार विभाग प्रमुख पृथ्वी सुब्बा गुरुङले जानकारी दिनुभयो । अध्यक्ष ओलीको प्रतिवेदनमा पछिल्लो राजनीतिक अवस्थाको समीक्षा गर्दै गठबन्धनको मनोवैज्ञानिक भयबाट मुक्त हुन जरुरी रहेको उल्लेख गरिएको छ । त्यस्तै ओलीले स्थानीय चुनावका लागि पार्टीका वडादेखि केन्द्रसम्मका नेताहरुलाई एक तह मुनिको भूगोलमा खटिन निर्देशन पनि दिनुभएको छ । बैठकमा सातै प्रदेश कमिटीका अध्यक्षहरुले पार्टीको अवस्थाका बारेमा रिपोटिङ गरेको गुरुङले बताउनुभयो । प्रदेश अध्यक्षहरुले पार्टी प्रवेशको लहरले पार्टी बलियो अवस्थामा रहेको दावी गरेका थिए । अन्य प्रदेशको तुलनामा मधेश प्रदेशमा भने पार्टीको वास्तविक अवस्थाको आंकलन गर्न नसकिएको प्रचार विभाग प्रमुख गुरुङले जानकारी दिनुभयो । त्यस्तै बार्षिक क्यालेन्डर निर्माण, निर्वाचनमा पार्टीको नीति लगाएतका एजेण्डामाथि बिहीबार छलफल हुने र आवश्यक निर्णय गरिने गुरुङले बताउनुभयो ।
