काठमाडौं, 13 नवम्बर 2021
नेकपा एकीकृत समाजवादीका अध्यक्ष माधव कुमार नेपालले एमालेमा रहेका केहि नेताहरुको बिजोग भएको तर्क गर्नुभएको छ । समाजवादी काभ्रे काठमाडौं सम्पर्क मञ्चले शनिबार काठमाडौंमा गरेको कार्यक्रममा अध्यक्ष नेपालले एमाले अध्यक्ष केपी ओली सुध्रिन्छन् कि भनेर एमालेमा बसेका नेताहरुको बिजोग भएको तर्क गर्नुभएको हो । उहाले अहिले पनि एमाले भित्र ओलीले गुट नै चलाईरहेको धारणा पनि राख्नुभयो । नेपालले केहि नेताहरु समाजवादीमा फर्कने क्रम सुरु भइरहेको दावी गर्नुभयो । पुराना पार्टीसंगै बिद्रोह गरेर बनेको पार्टीमा जनलहर र उत्साह देखिएको उहाले बताउनुभयो । उहाले आउने राष्ट्रिय सभा निर्वाचनमा मिलेर जाने सहमति गठबन्धनबीच भएको भन्दै अवको निर्वाचनमा एमालेको पत्तासाफ हुने उल्लेख गर्नुभयो । अवको निर्वाचनमा कलम चिन्हका साथ जनतामाझ जाने र जनताले विश्वास गर्ने उहाको भनाई छ । कार्यक्रममा बिभिन्न दलबाट आएका व्यक्तिहरुलाई अध्यक्ष नेपालले समाजवादी प्रवेश गराउनुभएको थियो ।
