काठमाडौं, 14 दिसम्बर 2021
कानुन, न्याय तथा संसदीय मामिलामन्त्री दिलेन्द्रप्रसाद बडूले प्रमुख प्रतिपक्ष नेकपा (एमाले) सँग वार्ता र संवादका लागि सरकार तत्पर रहेको बताउनुभएको छ । मंगलबार संसद भवन नयाँ बानेश्वरमा सञ्चारकर्मीसंग कुरा गर्दै बडूले दलहरुको व्यस्तताका कारण एमालेसंग छलफल हुन नसकेको भन्दै वार्ता र संवादबाटै समस्याको समाधान गर्न तयार रहेको बताउनुभएको हो । एमालेको महाधिवेशन सम्पन्न भएको र कांग्रेसको महाधिवेशन जारी रहेकाले दलहरुको महाधिवेशन सकिएपछि आपसमा बसेर सहमतिको वातावरण निर्माण गरिने उहाको भनाई छ । उहाले सहमतिको प्रयासस्वरुप नै मंगलबारको बैठकमा अध्यादेश पेशबाहेक अन्य कार्यसूची अघि नबढाइएको दावी गर्नुभयो । त्यस्तै एमाले सांसद शान्ता चौधरीले संसद अवरुद्ध गर्ने कुनै रहर नभएर बाध्यता भएको बताउनुभयो । आफुहरुको मागका बारेमा सभामुखलाई ध्यानाकर्षण गर्दा पनि कुनै सुनुवाई नै भएको उहाको भनाई छ । एमालेका तत्कालीन नेता माधवकुमार नेपालसहित १४ सांसद्लाई कारबाहीका लागि सिफारिश गरिएकामा त्यसको सुनुवाइ नगरेको आरोप लगाउदै एमालेले मंगलबार संघीय संसदको दुवै सदनमा बिरोध जनाएको थियो ।
