काठमाण्डौ, 22 जुलाई 2021
नेकपा (एमाले) का अध्यक्ष केपी शर्मा ओलीले पार्टीमा असन्तुष्ट रहेको समूहलाई ‘आममाफी’ दिने बताएका छन्। ललितपुरको च्यासलमा आयोजित पुष्पलाल स्मृति कार्यक्रममा ओलीले बाटो बिराएकालाई माफ गर्ने बताएका हुन्। वरिष्ठ नेता माधवकुमार नेपाल समूहलाई लक्षित गर्दै ओलीले भने, ‘सबैलाई एकताका लागि भन्न चाहन्छु एम्नेस्टी इज ग्रान्ट्रेड। बाटो बिराएका साथीहरुलाई पनि म भन्न चाहन्छु।’ बुधवार मात्रै ओलीले २४ घण्टे अल्टिमेटम दिएर नेपाल पक्षका २२ सांसदलाई स्पष्टीकरण पत्र पठाएका थिए। उनले माधव कुमार नेपालालाई दोस्रो अध्यक्ष बनाउने प्रस्ताव पनि गरेका थिए। तर, नेपालले आफ्नो प्रस्ताव स्वीकार नगरेको ओलीले बताएका थिए। ओलीले नेपाल पक्षलाई पार्टीमा फर्कन आग्रह समेत गरेका छन्। तर, नेपाल पक्षका कारण पार्टीले ठुलो धक्का बेहोरेको ओलीको भनाई थियो। ‘आउनुस मिलेर काम गरौ। यस आन्दोलनलाई मजबुत पारौं। एकजुट भएर जाऔ। यस आन्दोलनले सानो धक्का बेहोरेको छैन्। आज फेरि एकजुट भएर अगाडि बढौँ,’ उनले भने।
