दिल्ली, 22 अगस्त 2022

नेपाली राजनीतिमा विद्वान राजनेताको रूपमा चिनियएका कांग्रेस नेता प्रदीप गिरीको निधनमा प्रवासमा रहेका संघ संगठन हरुले गहिरो दुख प्रकट गरेका छन। आइतबारका दिन 75 वर्षको उमेरमा ललितपुरको मेडिसिटी अस्पतालमा राति 9:30 बजे उनको निधन भएको हो। केही हप्ता पहिले मात्रै उनी भारतमा घांटीको कैंसरको उपचार गरेर साउन दोस्रो साता नेपाल फर्केका थिए। त्यसपछि स्वास्थ्यमा समस्या देखिए पछि साउन 9 गते उनी मेडिसिटीमा भर्ना भएका थिए। उनको जन्म 2004 सालमा सिरहाको बस्तीपुरमा भएको थियो। बुबा मित्रलाल गिरि र पुण्यप्रभाका पुत्र गिरिले भारतको जवाहरलाल नेहरू विश्वविद्यालयबाट दर्शनशास्त्र र अर्थशास्त्रमा स्नातकोत्तर गरेका थिए । नेपालका सबैजसो शान्तिपूर्ण राजनीतिक आन्दोलनमा उनी सहभागी थिए । त्यसक्रममा उनी कांग्रेसका संस्थापक बिपी कोइरालाका सहयात्रीसमेत भए । बिपीसँग उनको भारतको बनारसमा छात्र संघमा निर्वाचन लड्दादेखिको राजनीतिक संगत थियो । राजनीतिक संघर्षकै क्रममा गिरिले 3 वर्ष जेल जीवन बिताए । 2051 सालदेखि संसदीय राजनीतिमा सक्रिय उनी 2056 को आम निर्वाचनमा पराजित भए । 2064 र 2070 को संविधानसभामा समानुपातिक सांसद्को रूपमा संविधान लेख्ने कार्यमा सक्रिय गिरिले 3 असोज 2072 मा जारी संविधानमा भने हस्ताक्षर गरेनन् । त्यसपछि 2074 मा भएको संघीय निर्वाचनमा प्रत्यक्षतर्फ उनी निर्वाचित भए । पकट–पटक सांसद् बनेका गिरिमा सत्ता प्राप्तिको लालशा कहिल्यै देखिएन । गिरिका लेनिनको जीवनी, नारी, मार्क्सवाद र अर्थशास्त्रलगायत एक दर्जनभन्दा बढी पुस्तक प्रकाशित छन् । शालीन र त्यागी नेता गिरीको निधनमा नेपाल जनसम्पर्क समिति पश्चिम भारत क्षेत्रका अध्यक्ष उदय राज खड्काले गहिरो शोक व्यक्त गरेका छन। नेशनल लाईभ टिभीका संचालक र नेपाल पत्रकार महासंघ भारत शाखाका अध्यक्ष लोकेश शाह आर्यनले पनि उनको निधनमा गहिरो दुख प्रकट गरेका छन। उनले गिरीको निधनले नेपाली राजनीतिमा ठुलो क्षति पुगेको बताएका छन। त्यस्तै भारतमा कार्यरत विभिन्न संघ संगठनहरुले पनि गहिरो संवेदना प्रकट गर्दै हार्दिक श्रद्धान्जलि अर्पण गरेका छन।