काठमाडौं, 7 फरवरी 2023
काठमाडौं उपत्यकाका चार स्थानमा बर्डफ्लू देखिएको छ । ललितपुरको खुमलटार, नागर्जुन–६ रामकोट, तार्केश्वर –७, संगालछाप र शंखमूलमा बर्डफ्लू देखिएको हो । पशु सेवा विभागका सूचना अधिकारी चन्द्र ढकालले साउनयता पहिलो पटक बर्डफ्लू देखिएको पुष्टि गरे । कृषि अनुसन्धान परिषद् नार्कको अनुसन्धान फार्ममा पहिलो संक्रमण पुष्टि भएको थियो । सूचना अधिकारी ढकालका अनुसार त्यहाँ अनुसन्धान प्रायोजनका लागि पालिएका टर्की र अरु चराहरु मर्न थालेपछि त्यसको नमूना परीक्षणमा पठाउँदा आइतबार बर्डफ्लू पुष्टि भयो । हालसम्म सबै फार्ममा ६ हजार ७१८ वटा कुखुरा, १० हजार २४५ र ५५० केजी दाना नष्ट गरिसकिएको विभागले जनाएको छ । बर्डफ्लू देखिएसँगै कुखुरा र अन्डा तथा दानाहरु नष्ट गर्ने काम भइरहेको छ । रामकोटमा ४ हजार ५९१ वटा कुखुरा र २ हजार २५५ वटा अन्डा नष्ट गरिएको छ । त्यसैगरी, तार्केश्वरमा ९४० वटा कुखुरा, दाना १०० केजी र १००० वटा क्रेट नष्ट गरिएको छ । साथै ललितपुरको खुमलटारमा २ हजार ५३० वटा अन्डा, २१७ वटा कुखुरा र दाना २५० केजी नष्ट गरिएको छ ।
