काठमाडौं, 19 मार्च 2022
नेकपा एमालेका अध्यक्ष केपी शर्मा ओलीले आगामी निर्वाचनमा सहि बिचार लिएर जनतामा जानुपर्ने बताउनुभएको छ । शनिबार काठमाडौंमा मदन भण्डारी फाउण्डेशनको तेस्रो राष्ट्रिय सम्मेलनको काठमाडौँमा उद्घाटन गर्दै अध्यक्ष ओलीले मुलुकको समृद्धि र समाजवादका लागि सहि बिचार लिएर जनतामाझ जानुपर्ने बताउनुभएको हो । उहाले समृद्ध नेपाल, सुखी नेपाली भन्नु नै जनताको बहुदलीय जनवादको रूपान्तरण भएको तर्क गर्नुभयो । केहिलाई समृद्ध नेपाल, सुखी नेपाली नारा नै मन नपरेको र यसलाई परिवर्तन गर्न खोजेको उहाले बताउनुभयो । अध्यक्ष ओलीले दरबार हत्याकाण्डमा दिपेन्द्रलाई हत्यारा साबित गर्न अनेक नाटक गरिएको र कसैले त्यसबेला प्रश्न समेत उठाउन नसकेको भन्दै दरवार हत्याण्ड र मदन–आश्रित हत्याकाण्ड रहस्यमै सिमित हुन पुगेको धारणा पनि राख्नुभयो । कार्यक्रममा मदन भण्डारी फाउण्डेशनसँग सहकार्य गर्दै आएका त्रिभुवन विश्व विद्यालयका विभिन्न बिभागका प्रतिनिधिहरुलाई सम्मान गरिएको थियो ।
