धनगढी, 28 मार्च 2020/ हिम शाह
सेती प्रादेशिक अस्पतालको आईसोलेसनमा रहेका कोरोना संक्रमित व्यक्तिलाई स्वास्थ्यकर्मीहरुले उपचार गर्न छोडेका छन्। 11 गतेदेखि आईसोलेसनमा रहेका उनी संक्रमित भएको पुष्टी भएपछि हिजो साँझदेखि स्वास्थ्यकर्मी उनको नजिक गएका छैनन्। उनले सञ्चारकर्मीहरुसंग आफू बाँच्न चाहेको र आफ्नो उपचार गरिदिन स्वास्थ्यकर्मीहरुसंग आग्रह गरेका छन्।
हिजो साँझदेखि स्वास्थ्यकर्मीहरु भेट्न आएका छैनन, आईसोलेनमा रहेका उनले टेलिफोनमा भने, घरका मान्छेले तातो पानी तताउने केतली ल्याईदिए। त्यसैमा पानी तताएर खाए। अरु केही खान पाएको पनि छैन। उनले आफू संक्रमित भएपनि आफ्नो स्वास्थ्य अवस्था सामान्य रहेकोले उपचार गरिदिन डाक्टरहरुसंग आग्रह गरेका छन्। उनका बुवा,आमा, दाई भाउजु, भतिजी, पत्नी र छोरी सहित परिवाका 8 जना सदस्य घरमै छन्।
उनी संक्रमित रहेको पुष्टि भएपछि प्रहरी राति उनका परिवालाई लिनका लागि धनगढी उपमहानगरपालिका वडा नम्बर 5 हसनपुर स्थित घरमा गएको थियो। एम्बुलेन्स चालकले पीपीई नभएको भन्दै उद्दार गर्न नमानेका कारण प्रहरी उनीहरुलाई घरमै छोडेर हिजो मध्यराति रित्तै फर्किएको थियो।
