नयाँदिल्ली,३१ जनवरी
चीनको वुहानबाट फैलिएको कोरोना भाइरसले गर्दा अहिले विश्व त्रसित छ । चीनलगायत छिमेकी मुलुक हुँदै अस्ट्रेलिया, अमेरिका, युरोपसम्म कोरोना भाइरस संक्रमित मानिस भेटिइसकेका छन् । यसबाट विश्व मानव जगत त्रसित त छँदैछ । जनजीवनसँगै खेलकुद जगत पनि कोरोना भाइरसको संक्रमणबाट टाढा रहन सकेको छैन ।
चिनियाँ अधिकारी र विश्व स्वास्थ्य संगठनलगायत सम्पूर्ण सरोकारवाला कोरोना भाइरसको संक्रमण रोक्नेतर्फ तल्लीन छन् ।
कोरोना भाइरसले फुटबल क्षेत्रमा पारेको प्रभाव
कोरोना भाइरसले महामारीको रूप लिएपछि चीनमा हुने फुटबल खेलहरूको स्थान सारिएको छ। कतिपय स्थानमा खेलको तालिका नै स्थगित गरिएको छ ।
विश्व प्रसिद्ध खेलाडीको उपस्थिति रहने चाइनिज सुपर लिगअन्तर्गत फेब्रुअरी ५ मा हुने तय भएको ग्वान्जाओ एभरग्रान्ड र सान्घाई सेन्हुवाबीचको खेल स्थगित भइसकेको छ।
त्यस्तै एएफसी च्याम्पियन्स् लिगअन्तर्गत हुने चीनको सांघाई एसआइपिजी र थाइल्यान्डको बुरिराम युनाइटेडबीच जनवरी २८ मा हुने भनिएको खेल पनि स्थगित भएको छ । एएफसीले चीनका चार क्लबहरू बेइजिङ, सांघाई सेन्हुवा, ग्वान्जाओ एभरग्रान्ड र सांघाई एसआइपिजीले पहिले ‘अवे’ खेल खेल्नुपर्ने जानकारी गराएको छ ।
चिनियाँ फुटबल संघले राज्यका उच्च अधिकारीसँगको छलफलपछि फेब्रअरी २२ बाट सुरु हुने चाइनिज सुपर लिग २०२० सिजन पनि अनिश्चित कालका लागि स्थगित गरेको छ । यो अनिश्चितताले सामान्य जीवनयापनसँगै लिगमा उपस्थित हुने विदेशी स्टार खेलाडीको बहिर्गमन र आगमनमा पनि ठूलो प्रभाव पारेको छ ।