काठमाण्डौ, 28 सेप्टेम्बर 2020
कोरोना भाइरस महामारीपछि विभिन्न ३२ वटा देशमा अलपत्र परेका ८० हजार ८७४ नेपाली स्वदेश फर्किएका छन्। कोभिड–१९ संकट व्यवस्थापन केन्द्र (सीसीएमसी) का अनुसार आइतबार मात्रै ८५८ जना स्वदेश फर्किएका छन्।
सबैभन्दा धेरै संयुक्त अरब इमिरेट्सबाट २३ हजार ७२६ जना स्वदेश फर्किएका छन्। केन्द्रका अनुसार हालसम्म साउदी अरेबियाबाट १२ हजार ५५५, मलेसियाबाट ११ हजार ६५१, कतारबाट ११ हजार १५०, कुवेतबाट आठ हजार ४७८, जापानबाट एक हजार ७५४, दक्षिण कोरियाबाट एक हजार ४४७ जना फर्किएका छन्।
ओमनबाट एक हजार ५०३, बहराइनबाट एक हजार २७४, अष्ट्रेलियाबाट एक हजार ९१, टर्कीबाट ९३६, बङ्गलादेशबाट ८८८, माल्दिभ्सबाट ८५३, सिङ्गापुरबाट ५५५, अमेरिकाबाट ४३०, चीनबाट ३५० र जोर्डनबाट ३१७ र श्रीलंकाबाट पाँच जना नेपाली स्वदेश फर्किएका केन्द्रले जनाएको छ।
प्रदेश-१ का १४ हजार ६११, प्रदेश-२ का १२ हजार तीन, बागमती प्रदेशका १८ हजार २६४, गण्डकी प्रदेशका नौ हजार ३०, प्रदेश-५ का ११ हजार ६११, कर्णाली प्रदेशका एक हजार ५२५ र सुदूरपश्चिम प्रदेशका एक हजार ७४५ स्वदेश फर्किएको केन्द्रले जनाएको छ। केन्द्रका अनुसार फर्कनेमध्ये ११ हजार २२७ जनाको भने प्रदेश विवरण प्राप्त भएको छैन। आइतबार फर्किएकाको पनि प्रदेश विवरण प्राप्त नभएको केन्द्रले जनाएको छ।
आइतबार फर्किएकाहरूलाई नेपाली सेनाको व्यवस्थापनमा प्रादेशिक रूपमा स्थापना गरिएको ‘होल्डिङ सेन्टर’मा राखिएको छ। व्यक्तिगत विवरण संकलन, स्वास्थ्य परीक्षण लगायतका आवश्यक प्रक्रिया पूरा गरी सम्बन्धित प्रदेशको समन्वयमा क्वारेन्टिनमा पठाउने तयारी भइरहेको केन्द्रले जनाएको छ।
