काठमाडौं, 18 मई 2023
प्रधानमन्त्री पुष्पकमल दाहाल ‘प्रचण्ड’ले क्यान्टोनमेन्टमा भ्रष्टाचार देखिएको हल्ला कपोकल्पित र निराधार रहेको बताएका छन् ।बिहीबार प्रतिनिधिसभा बैठकमा उनले शान्ति सम्झौता भएर ‘क्यान्टोनमेन्ट’मा तत्कालीन जनमुक्ति सेनालाई राख्ने निर्णयपश्चात् त्यसको भौतिक पूर्वाधार र रासनपानीका लागि पैसा दिइएको बताए । त्यसको हिसाबकिताबको सबै रेकर्ड रहेको उनले स्पष्ट पारे ।यदि, यो विषयमा दोषी ठहरिए आफू जेल जान तयार रहेको पनि उनले बताए ।
बैठकमा राप्रपाका सांसद ज्ञानेन्द्र शाहीले सोधेको लडाकु शिविरमा भएको भ्रष्टाचारबारेको प्रश्नको जवाफ दिँदै प्रधानमन्त्रीले भने, ‘पूर्व माओवादी लडाकुलाई वितरण गरिएकै पैसामा भ्रष्टाचार भयो भन्ने आरोप मात्र हो । क्यान्टोनमेन्टको भौतिक पूर्वाधारको जिम्मा कसले लिए त्यसको रेकर्ड छ । त्यतिबेलाका प्रधानमन्त्री गिरिजाप्रसाद कोइराला र अर्थमन्त्री डा. रामशरण महतले रुजु गरेपछि यो विषय पटाक्षेप भएको हो,’ प्रधानमन्त्री दाहालले भने, ‘यो राजनीतिक पूर्वाग्रहका हिसाबले अहिले उठाइएको छ । पटक-पटक यो विषय राजनीतिक आग्रहको आधारमा उठाइन्छ । त्यस्तो केही छ भने २०४८ सालदेखिको सबै भ्रष्टाचारका मुद्दामा छानबिन गर्न तयार छु । राजनीतिक तहमा संकल्प गरेर जाँदा छानबिन गर्न सकिन्छ ।’
