1 नवम्बर 2021
ब्रिटिस गोर्खाहरुको माग पुरा गर्न प्रधानमन्त्री शेरबहादुर देउवाले बेलायती सांसदहरुलाई आग्रह गर्नु भएको छ । लन्डनमा बेलायती सांसदहरुसँग भेट्दै आफूले आग्रह गरेको र सांसदहरु सकारात्मक पाएको जनाउनु भयो । ब्रिटिस गोर्खाको मागप्रति देउवाले नेपाल सरकारको पूर्ण समर्थन रहेको समेत जनाए । ‘बेलायती सांसदहरु सहयोग गर्ने पक्षमा छन्’ देउवाले भन्नु भयो, ‘बेलायतले माग पुरा गर्न आफू सकारात्मक भएको छ ।’ प्रदूषणमुक्त क्षेत्रमा नेपालमा लगानीको सम्भावना रहेको देउवाले बताउनु भयो ।
वनक्षेत्र ५० प्रतिशत बढाउने योजना सरकारले गरिरहेको जनाए । ‘नेपालको कानूनले विदेशी लगानीलाई स्वागत गर्छ र विदेशी पैसा खेर जान दिँदैन । सरकार आउने जाने कुराले फरक पर्दैन’ भन्नु भयो । देउवाले नेपालमा विदेशी लगानीको वातावरण एकदमै राम्रो भएको बताउँदै जलविद्युतको सम्भावना प्रचुर रहेको बताउनु भयो । उहाँले भन्नु भयो ‘नेपालमा हाइड्रो, इलेक्ट्रिक कार र चुल्हो बनाउन सक्छौं । हामीले फोसिल फ्युलको विकल्प खोजिरहेका छौं’ । बेलायतमै अध्ययन गरेको र प्रधानमन्त्रीको रुपमा बेलायत जाँदा घरमा आएजस्तो महसुस भएको बताउनु भयो।
