नयाँ दिल्ली, 24 फरवरी 2020
भारतका केन्द्रीय आदिवासी मामिलामन्त्री अर्जुन मुण्डाले गोर्खा सेनाको योगदान भारतप्रती अतुलनीय रहेको बताउनु भएको छ। कानुङ लाङ्घाली समाज दिल्लीले आइतबार दिल्लीमा आयोजना गरेको मगर महोत्सव समारोहमा बोल्दै मन्त्री मुण्डाले आफु झारखण्डको मुख्यमन्त्री रहेका बेलादेखी नेपाल र नेपालीहरुसित परिचित रहेको भन्दै गोर्खा फौजको समर्पणको प्रसंशा गर्नुभएको हो। नेपाल-भारतबिच पारम्परिक, भाषिक, सांस्कृतिक र भावनात्मक अटुट सम्बन्ध रहेको भन्दै नेपालको जनजाति समाजलाई यस वैज्ञानिक युगमा समयसँगै अगाडी बढाउन भारत सरकार सँधै तयार रहने विश्वास व्यक्त गर्नुभयो।
मगर समाज स्वाभिमानी , सांस्कृतिक धरोहर भएको र लडाकु समाज भएको भन्दै अंग्रेजसँगको लडाई होस वा अन्य लडाईहरुमा मगर समाजले उत्कृष्ट योगदान दिएको सुन्न पाउँदा आफुलाई गर्व लागेको बताउनु भयो। आदिवासी जनजातिहरुको विशेषता बताउँदै उहाँले आदिवासीहरुमा पहाडको गुंजयलाई सुन्न सक्ने क्षमता हुने बताउनुभयो।
उहाँले हामीले हाम्रो परम्परामा हमला गर्ने तत्वहरुबाट सतर्क रहनुपर्ने आवश्यकता रहेको बताउनुभयो। उहाँले आफुहरु राजनितिक रुपमा भारतको र तपाईहरु (मगर) नेपालको भएपनी आखिरमा हामी सबै आदिवासी एकै भएको भन्नुभयो।
कार्यक्रममा मन्त्री मुण्डालाई मगर पहिरन र ढाका टोपी पहिराइएको थियो भने खुकुरी प्रदान गरिएको थियो।
