नयाँ दिल्ली, 16 अक्टोबर
घरको यकीन ठेगाना थाहा नहुँदा विगत 4 वर्षदेखि एक बालिका आश्रममा रहँदै आएकी कैलालीको सुख्खडकी एक बालिका आफ्नो घर फर्किन पाएकी छैनिन । 11 वर्षको उमेरमा हराएर उत्तर प्रदेशको कानपुरको एक बालिका आश्रममा पुगेकी प्रियंका अहिले 15 वर्षकी भएकी छिन । आश्रमले त्यसयता उनको परिवारको खोजीका लागि कयौं प्रयास गरेपनि केही थाहा नहुँदा अहिले आफन्त नेपाललाई परिवार खोज्ने जिम्मा दिइएको छ । आफन्त नेपालका अनुसार प्रियंका चौधरी नाम बताउने उनले बुवाको नाम राम प्रसाद र आमाको नाम सिता रानी बताएकी छिन । उनले आफ्नो घर करैचा, सुख्खड, कैलाली मात्र बताएकाले उनको परिवारलाई खोज्न समस्या भएको छ । उनले आफ्नो भाईको नाम देवराज, बहिनीको नाम विनीता र काकाको नाम राम बहादुर बताएकी छिन । प्रियंकाले दिएको जानकारी अनुसार उनका बुवाले मदिरा सेवन गरि घरमा झगडा गर्ने गरेकाले उनकी आमाले 4 वर्षपहिले उनलाई लिएर अयोध्याको रामपेरी लिएर आएकी थिइन । उनिहरु त्यहा रहेका बेला जानकी महल मन्दीरमा खाना खाने गरेका थिए । त्यहाँ उनिहरु एक महिनादेखि रहिरहेका थिए । त्यस क्रममा उनकी आमाले उनलाई शैम्पु र मम्फली किन्न पठाएपछि उनि घरको बाटो बिराएर हराएकी थिइन । त्यसपछि उनि रेलवे स्टेशन नजिक एक गिरजाशंकर नामक व्यक्तिसँग भेटिएको र त्यसपछि ती व्यक्तिले उनलाई परिवारलाई भेटाइदिने भन्दै कानपुर पुऱ्याएका थिए । कानपुरमा भने रेलवे पुलिसले गिरजाशंकरलाई हिरासतमा लिएर बालिकालाई आश्रमको जिम्मा लगाएको थियो । तस्वीरमा देखिएकी बालिका प्रियंकालाई चिन्नु भएको छ भने दिल्लीमा नवीन जोशीलाई +919716293602 मा र नेपालमा आफन्त नेपाललाई -015533378/015542539 मा सम्पर्क गरि जानकारी दिन सक्नुहुनेछ ।
