चौंथो टी-२० मा मलेसियाले गर्यो नेपाललाई पराजित, सिरिजमा २-२ को बराबरी
काठमाडौं, 3 जुन 2023 | पाँच टि–२० अन्तर्राष्ट्रिय क्रिकेट शृंखलाको चौथो खेलमा नेपाललाई ४ विकेटले हराउँदै मलेसियाले २-२ को बराबरी गरेको छ ।
शनिबार बिहान नेपाली राष्ट्रिय महिला टिमले दिएको ९७ रनको लक्ष्य मलेसियाले ६ विकेट गुमाएर पूरा गरेको हो ।
अब सिरिज जित्ने टिमको टुंगो अन्तिम खेलले गर्ने भएको छ। नेपाल यसअघि पहिलो खेलमा पराजित हुँदा दोस्रो र तेस्रो खेलमा लगातार जित निकाल्दै सिरिजमा अग्रता बनाएको थियो। मलेसियाका लागि विन्फ्रेड एन दुराइसिंगमले सर्वाधिक ३८ रन बनाइन् । उनले ५२ बलमा २ चौकासहित उक्त योगफल तयार पारेकी हुन् ।
त्यस्तै माहिरा इजाती इम्माइलले १६ रन बनाउँदा मास इल्यासा यास्मिन जुल्किफ्लीले १३ रन बनाइन् । नेपालका लागि कविता कुँवर, रुबिना क्षेत्री, सीता राना मगर र कविता जोशीले १/१ विकेट लिए । यसअघि मलेसियाको बांगीस्थित वाईएसडी यूकेएम ओभलमा टस जितेर नेपालले पहिले ब्याटिङ गरेको थियो । निर्धारित २० ओभरमा नेपालले ७ विकेट गुमाउँदै ९६ रन बनाएको थियो । नेपालका लागि इन्दु बर्माले सर्वाधिक ३२ रन बनाइन् ।
त्यस्तै बिन्दु रावलले २४ रन बनाउँदा कविता कुँवरले नटआउट १२ रन बनाइन् । मलेसियाका लागि विन्फ्रेड एन दुराइसिंगमले सर्वाधिक ३ विकेट लिइन् । त्यस्तै माहिरा इजाती इस्माइल र आइसा इलिसा फिरदौजले १/१ विकेट लिए ।
यसअघि नेपालले मलेसियाविरुद्ध दोस्रो र तेस्रो खेल जितेको थियो । तेस्रो खेल नेपालले २७ रनले जितेको थियो भने दोस्रो खेलमा ७ विकेटको जित हात पारेको थियो । पहिलो खेलमा भने नेपाल ५ विकेटले स्तब्ध भएको थियो ।