काठमाडौं,१९ फरवरी, २०२०
कैलालीको टिकापुरमा बालेको आगो खरबारीमा सल्किएर आफैं आगलागी हुँदा एक वृद्धको मृत्यु भएको छ ।
मृत्यु हुनेमा टीकापुर नगरपालिका–७ सत्तीका ७० वर्षीय लालबहादुर भण्डारी रहेका छन् ।
सोही ठाउँमा रहेको सत्ती कर्णाली सामुदायिक वन नजिक चिसो भएपछि बालेको आगो खरबारीमा सल्किएर भएको आगलागीमा उनी परेका थिए आगलागी भएको स्थलमै । उनको मृत्यु भएको प्रहरीले जनाएको छ ।
भैँसी चराउन गएका उनले चिसो भएपछि आगो बालेका थिए । यसैगरी ललितपुरको गोदावरी नगरपालिका–७ देवीचौर तीनदोबाटो–३५ वर्षीय प्रेम तामाङको घरमा पनि आगलागी भएको छ ।
आफैंले सञ्चालन गरेको धान कुटाउने मिलमा विद्युत सर्ट भई बुधबार बिहान आगलागी हुँदा तामाङको घर र मिल तथा सोही घरमा कोठा लिएर पसल सञ्चालन गर्ने कल्पना तामाङको पसल जलेर नष्ट भएको छ । आगलागीबाट करिब ८ लाख ९० हजार रूपैयाँ बराबरको धनमाल जलेर नष्ट भएको छ ।
पर्साको वीरगन्ज महानगरपालिका–१७ अलौ बस्ने हारुल देवानको घरमा मङ्गलबार दिउँसो आगलागी हुँदा घर पूर्णरुपमा जलेको छ। जसबाट करिब २ लाख रूपैयाँ बराबरको धनमाल नष्ट भएको छ।
महोत्तरीको गौशाला नगरपालिका–४ सवरीकुट्टी बस्ने ४० वर्षीया चन्द्रकला भुजेलको घरमा बुधबार बिहान आगलागी भएको छ। छिमेकी ६० वर्षीया शान्ति देवी खड्काको घरमासमेत भुजेलको घरबाट सल्केको आगो पुग्यो। जसले गर्दा दुवै जनाको घर पूर्णरुपमा जलेर नष्ट भएको छ । प्रहरीका अनुसार दुई घर जल्दा करिब ३ लाख रूपैयाँ बराबरको धनमाल नष्ट भएको छ।
