ज्ञानेन्द्र मल्लद्वारा अन्तर्राष्ट्रिय क्रिकेटबाट सन्यासको घोषणा
काठमाडौं, 4 अगस्ट 2023
राष्ट्रिय क्रिकेट टोलीका सदस्य एवं पूर्व कप्तान ज्ञानेन्द्र मल्लले सन्यासको घोषणा गरेका छन्।काठमाडौंमा आज शुक्रबार एक पत्रकार सम्मेलन आयोजनामा भावुक बन्दै उनले सन्यास घोषणा गरेका हुन् ।
भावुक हुँदै उनले भने, ‘यो मेरो बिदाइ हैन, यो मेरो अर्को सुरुवात हो।’
‘क्रिकेटमा पनि कुनै समय कसैलाई मैले रिप्लेस गरेको थिएँ होला । यो मेरो समय हो । त्यसैले आज मेरो अन्तर्राष्ट्रिय क्रिकेट यात्रालाई विराम लगाउने र फरक यात्रा आरम्भ गर्ने निर्णय गरेको छु’, पत्रकार सम्मेलनमा लिखित प्रेस विज्ञप्ति पढ्दै मल्लले भनेका छन् ।
पारस खड्काले नेपाली राष्ट्रिय टिमको नेतृत्व त्यागेपछि ज्ञानेन्द्र कप्तान बनेका थिए। पारसले दुई वर्षअघि आजकै दिन (साउन १९ गते) राष्ट्रिय टीमबाट सन्यास घोषणा गरेका थिए।
मल्लले सन् २००५ देखि उमेर समूहको क्रिकेटबाट यात्रा सुरु गरेका थिए । उनले अन्तर्राष्ट्रिय क्रिकेटमा पूर्ण विराम लगाए पनि एउटा फरक यात्राको आरम्भ गर्ने बताएका छन् ।
लामो समय राष्ट्रिय क्रिकेट टोलीको प्रारम्भिक ब्याट्सम्यानको भूमिकामा रहेका मल्ल शालीन खेलाडीको रूपमा परिचित छन् । सन् २००५ देखि उमेर समूहको क्रिकेटबाट राष्ट्रिय क्रिकेटको यात्रामा जोडिएका मल्ल यु–१५ टोलीबाट आफ्नो परीक्षा दिएका थिए ।
यु–१७, यु–१९ हुँदै २००६ देखि राष्ट्रिय सिनियर टोलीमा डेब्यु गरेका मल्लले २०२३ मा जिम्बावेस्थित हरारे मैदानमा आइसिसी विश्वकप क्वालिफर्यसमा आयरल्यान्डविरुद्ध नेपाल राष्ट्रिय टोलीबाट अन्तिम खेल खेलेका थिए ।