दिल्ली, 14 मई 2022
भारतको राजधानी दिल्लीको पश्चिममा रहेको मुन्डकामा एउटा व्यावसायिक भवनमा आगलागी हुँदा कम्तीमा 27 जनाको मृत्यु भएको छ । आगलागीमा परी अरु 12 जना घाइते भएका छन् र केही मानिस अझै भवनभित्र फसेको प्रहरीले जनाएको छ । घाइतेहरुलाई अस्पतालमा भर्ना गरिएको छ । भारतीय संचार माध्यमका अनूसार सर्ट सर्किट भएर आगलागी भएको अनुमान गरिएको छ। आगो शुक्रबार बेलुका करिब पौने पाँच बजे लागेको थियो । लगभग 7 घण्टापछि आगोमाथि नियन्त्रण लिइएको थियो । यद्यपि, अबेर राती 12 बजे आगो पुनः सल्किन थाल्यो । दमकलका कर्मचारीले घटनास्थलमा पुगेर झ्याल फुटाउँदा त्यहाँ भित्र फसेका मानिसहरुको ज्यान बाच्न सफल भयो । भवनमा भित्र पस्ने र बाहिर निस्कने एउटै मात्रै ढोका भएकोले बचाउ कार्य छिटो सुरु हुन सकेन । उक्त भवनमा थुप्रै कम्पनीका कार्यालय रहेको छ । त्यहाँबाट करिब 150 जनालाई उद्धार गरिएको छ । उद्दारका लागि सय जनालाई तैनाथ गरिएको थियो । घटना प्रति भारतीय राष्ट्रपति रामनाथ कोविन्द, प्रधानमन्त्री नरेन्द्र मोदी, यूपीका मुख्यमन्त्री योगी आदित्यनाथ, दिल्लीका मुख्यमन्त्री अरविन्द केजरीवाल सहित केही नेताहरुले दुःख व्यक्त गरेका छन्। प्रधानमन्त्री नरेन्द्र मोदीले मृतकको परिवारलाई २–२ लाख भारु र घाइतेलाई 50 हजार भारु मददतको घोषणा गरेका छन् । दिल्लीका मुख्यमन्त्री अरविन्द केजरीवालले पनि मृतकको परिवारलाई 10-10 लाख र घाइतेहरुलाई 50 हजार मददतको घोषणा गरेका छन।
