नयाँ दिल्ली, 19 अप्रिल 2021
भारतको राजधानी नयाँदिल्लीमा सोमबार रातिदेखि लागू हुने गरी एक साताको लागि लकडाउन घोषणा गरिएको छ। दिल्लीका मुख्यमन्त्री अरविन्द केजरीवालले अर्को सोमबार बिहानसम्म लकडाउन गर्ने निर्णय भएको जानकारी दिनु भएको छ। पछिल्लो समय निरन्तर कोरोना संक्रमण बढेको भन्दै केजरीवालले सर्वसाधारणलाई यो लकडाउनको पालना गर्न आग्रह गर्नु भएको छ। एक साताको लकडाउनको क्रममा मानिसहरुलाई घरभित्रै बस्न केजरीवालले आग्रह गर्नुभयो । उहाँले अत्यावश्यक सेवा यो अवधिमा पनि सञ्चालन हुने बताउनुभयो। विवाहका लागि नरोक्ने तर ५० जनाभन्दा धेरै भेला हुन नपाइने उहाँको भनाइ छ । केजरीवालले पछिल्लो केही समययता दैनिक २५ हजारभन्दा धेरै नयाँ संक्रमित थपिइरहेको भन्दै यो निर्णय गर्नु आफ्नो बाध्यता रहेको बताउनुभयो । यो लकडाउनले कोरोना संक्रमण अन्त्य नभए पनि संक्रमण दरमा कमी ल्याउन सक्ने बताउनुभयो । उहाँले प्रवासी मजदूरहरुलाई न आत्तिन अपील गर्दै एक हप्तामै लकडाउन हट्ने अवस्थामा पुग्ने आशा व्यक्त गर्दै अनावश्यक यात्रा गरि घर नजान आग्रह गर्नुभएको छ। केजरीवालले पछिल्लो समय दिल्लीको स्वास्थ्य प्रणालीमा नै समस्या बढेकाले लकडाउनको समयमा दिल्लीमा संक्रमितको लागि अक्सिजन, औषधि, बेडको संख्या बढाउनेजस्ता काम हुने बताउनुभयो । उहाँले सबैलाई घरबाट बाहिर ननिस्किन आग्रह समेत गर्नु भएको छ । यसैबिच दिल्ली सरकारले लकडाउनको घोषणा गरेलगत्तै विभिन्न स्थानमा मानिसहरुले आवश्यक खाद्य पदार्थको किनमेल गर्न भीड लगाएका छन । आज राति 10 बजेबाट लकडाउन शुरु हुने भएपछि मानिसहरु आवश्यक किनमेल गर्न लागेका हुन । दिल्लीमा मदिरा पसलहरुमा पनि ठूलो भीड लागेको देखिएको छ ।
