नयाँ दिल्ली, 28 जनवरी 2020
भारतको राजधानी नयाँ दिल्लीमा तामाङ समूदायको नयाँ वर्षको उपलक्ष्यमा सोनाम ल्होसार साँझ कार्यक्रम गरिएको छ।योल्मो पाँच पोखरी तामाङ संस्थाले दिल्लीमा मङ्गलबार ल्होसार साँज कार्यक्रम गरेको हो। आफ्नो वैदिक पुजाबाट सुरू गरिएको कार्यक्रममा दिल्लीमा बस्ने तामाङ समूदायका साथै ठूलो संख्यामा प्रवासी नेपालीहरूको उपस्थिति रहेको थियो।
लम्थेपा लामाले अध्यक्षता गर्नुभएको कार्यक्रममा नेपाली राजदूतावासका सांस्कृतिक काउन्सलर होम प्रसाद लुइटेल प्रमुख अतिथिका रूपमा उपस्थित रहनुभएको थियो भने, पाँच पोखरी थङ्गपाल गाँउपालिका वडा नम्बर 3-का वडा अध्यक्ष निमा छिरिङ्ग तामाङ विशिष्ट अतिथिका रूपमा उपस्थित रहनुभएको थियो।
समारोहमा टसी दे-ले स्वागत गीत प्रस्तुत गर्नुभएको थियो भने, स्याब्रु ग्रूपले मौलिक गीत प्रस्तुत गरेको थियो। समारोहमा स्थानीय कलाकारहरूले भव्य सांस्कृतिक कार्यक्रम प्रस्तुत गरेका थिए। तामाङ समूदायको नयाँ वर्ष गत शनिबार मनाइए पनि प्रवासी नेपालीहरूले भने मङ्गलबार मनाएका हुन्।
सोनाम ल्होसार तामाङहरूले नयाँ वर्षको आरम्भको रूपमा मनाउने पर्व हो। योल्मो पाँच पोखरी तामाङ संस्थाले विगत लामो समयदेखि ल्होसार पर्व मनाउँदै आएको छ भने, विभिन्न किसिमका सामाजिक कार्यहरूमा पनि सक्रिय भूमिका निभाउदै आएको छ।
