नयाँ दिल्ली , 23 मार्च
दिल्लीस्थित नेपाली राजदूतावासले भारतमा रहने नेपालीहरुलाई अहिले नेपाल फर्किने प्रयास नगरि आफु बसोबास गरिरहेको ठाँउमा रहन आग्रह गरेको छ । दूतावासले भारत सरकार र विभिन्न राज्यका सरकारहरुले कोरोना भाईरसको रोकथामका लागि भन्दै लकडाउन गरेको र नेपाल सरकारले पनि आजबाट लागु हुनेगरि नेपाल-भारत सीमामा मानिसहरुको आवत-जावतमा रोक लगाएकाले निर्देशनको पालना गरि सुरक्षित रहन भारतमा रहेका नेपालीहरुलाई अपील गरेको हो ।
दूतावासले भारतमा रहेका नेपालीहरुलाई आफुले नियमित बसोबास गरेको स्थानमा सुरक्षित भएर बस्न र अत्यावश्यक काम बाहेक घरबाट बाहिर ननिस्कन अपील गरेको छ ।
कोरोना भाईरस महामारीको रोकथामका लागि भन्दै भारतका विभिन्न राज्यहरुमा लकडाउन गरिएका कारण भारतका विभिन्न क्षेत्रहरुमा नेपालीहरु अलपत्र परेका खबरहरु प्रकाशमा आएका छन । सार्वजनिक र नीजि यातायातका सवारी साधनहरुलाई पनि कडाई गरिएपछि भारतमा मजदूरी गर्न गएका नेपालीहरु त्रासमा छन । काम गर्ने कलकारखाना र उद्योग धन्दाहरु पनि बन्द हुँदा नेपाल फर्किने प्रयास गरेका कारण उनिहरु झनै समस्यामा परेका छन । यद्दपी बाटोमा अलपत्र परेका सयौं नेपालीहरुलाई नेपाली दूतावासको समन्वयमा नेपाल फिर्ता पठाउने कामहरु भइरहेको छ भने बाँकी रहेका नेपालीहरुलाई पनि नेपाल फिर्ता पठाउने कामहरु भइरहेको छ ।
भारत सरकारले गरेका निर्णयका कारण भारतमा रहेका नेपालीहरु आत्तिएका छन । उनिहरु आत्तिएर घर पुगे सबै ठीक हुन्छ भन्ने सोचिरहेका छन । तर वास्तविकता फरक छ। भारतका विभिन्न राज्यमा गरिएका लकडाउन अर्थात पूर्ण बन्दका कारण बजार, पसल, रेल, मेट्रो, सरकारी र नीजि बस, अटो पूर्ण रुपमा बन्द भएको छ । हिजोसम्म बस तथा रेल सेवाहरु सुचारु रहेपनि अब भने 31 मार्च सम्मका लागि बन्द गरिएको छ । त्यस कारण नेपाल जान भनि हिँडेका सयौं नेपालीहरु बिच बाटोमै अलपत्र परेका हुन । नेपाली दूतावास र भारतस्थित विभिन्न संगठनहरुले उनिहरुलाई फिर्ता पठाउने वातावरण मिलाईरहेको छ ।
Mobile number…..
अहिले कोरोना भाईरसको प्रकोपलाई रोक्न भारत सरकारले चालेको सावधानीका उपायका कारण भारतमा नेपालीहरु आत्तिएका छन । तर दिल्लीस्थित नेपाली दूतावासले आत्तिने वा डराउनु पर्ने कुनै कारणहरु नरहेको जनाएको छ । दिल्लीस्थित दूतावासले अनावश्यक यात्रा नगर्न नेपालीहरुलाई अपील गर्दै अप्ठ्यारो परेको अवस्थामा भने दूतावासमा जानकारी गराउन भनेको छ । त्यसका लागि नेपाली दूतावासको आपतकालीन नम्बर 8929601925 मा सम्पर्क गर्न भनेको छ ।
कारणवश कुनै नेपालीहरु अप्ठ्यारोमा पर्नु भएको खण्डमा नेपाली दूतावास र प्रवासी नेपाली संगठनहरुसँग सम्पर्क गर्न सक्नुहुनेछ । तपाईहरुले नेपाली दुतावासका साथै प्रवासी नेपाली एकता मञ्चका आरबी खडकाको मोबाइल नम्बर 9958492898 मा सम्पर्क गरि सहयोग लिन सक्नुहुनेछ ।
