दिल्ली, 14 फरवरी 2023

भारतको दिल्ली र मुम्बईमा रहेका बीबीसीको कार्यालयमा आयकर विभागले छापा मारेको छ । भारतीय मिडियाहरुका अनुसार ६० देखि ७० जना कमर्चारी संलग्न रहेर अहिले छापा चलिरहेको छ ।  अहिले बिबिसीको कार्यलयमा कसैलाई पनि आउन र जान रोक लगाइएको बताइएको छ । आयकर विभागले बीबीसीलाई अन्तर्राष्ट्रिय करमा अनियमितता गरेको आरोप लगाउदै छापा मारेको मिडिया रिपोर्टमा उल्लेख गरिएको छ ।  दिल्ली र मुम्बईका कार्यालय बीबीसी वर्ल्ड सर्भिस अन्तर्गत सञ्चालन हुन्छन् ।  यसअघि बिबिसीले भारतीय प्रधानमन्त्री नरेन्द्र मोदीको बारेमा एक डकुमेन्ट्री प्रकाशित गरेपछि भारत सरकार र बिबिसीबीच विवाद रहेको छ । भारत सरकारले सो डकुमेन्ट्री प्रसारणमा प्रतिबन्ध लगायेको थियो।  ब्रिटिश ब्रोडकास्टिङ कर्पोरेशन (बिबिसी) वर्ल्ड सर्भिस टेलिभिजन बेलायती सरकारी संस्था हो । यसले ४०  भाषाहरूमा समाचार प्रसारण गर्दछ । यो युके संसदको अनुदानद्वारा वित्त पोषित छ । यसको व्यवस्थापन विदेश र राष्ट्रमंडल कार्यालय मार्फत गरिन्छ । यो डिजिटल, संस्कृति, मिडिया र खेलकुद विभाग अन्तर्गत काम गर्दछ । बीबीसी सन् १९२७ मा शाही बडापत्र अन्तर्गत सुरु भएको थियो ।