बैतडी, ५ फरवरी, २०२०
बैतडीका स्थानीय बासीहरुले सडकलाई प्राथमिकतामा राखेका छन् । सोही अनुसार दुर्गम क्षेत्रमा सडक सञ्जाल बिस्तार भइरहेका छन् । मेलौली नगरपालिका १ को दुर्गम जर्कु टोलमा बुधबार सडक पुगेपछि स्थानीय बासीहरु खुसी भएका छन् ।
सडक निर्माण भएर गाउँमा पहिलो पटक गाडी पुग्दा स्थानीय हर्षित भएका हुन् । नगरपालिका तथा वडा कार्यालयको ८० लाख ८० हजारको लगानिमा जर्कु टोलमा सडक पुर्याइएको मेलौली नगरपालिका १ का वडा अध्यक्ष सुरतसिंह नेगीले जानकारी दिए। उनले भने, ’स्थानीयको चाहना अनुसार गाउँमा सडक र्पुयाइएको हो।’ गाउँमा सडक पुगेपछि जर्कु टोल र नङरौं टोलका स्थानीय लाभान्वित भएका स्थानीय लक्ष्मण पार्कीले जानकारी दिए। ’गाउँमा सडक पुगेपछि आफूहरू निकै खुसी छौं’ उनले भने, ’गाउँमा सडक पुगेसँगै सामग्री ढुवानी गर्न र यातायात समेत सहज हुनेछ।’