इटहरी, 3 दिसम्बर 2022
सञ्चार तथा सूचना प्रविधिमन्त्री ज्ञानेन्द्रबहादुर कार्कीले देशको समग्र विकास, जनताको आर्थिक समृद्धि र रोजगारी सृजनाको लागि विशेष योजना बनाएर अगाडि बढ्नुपर्ने धारणा राखेका छन ।
देशको गरिबी निवारण तथा बेरोजगारी समस्यालाई न्यूनीकरण गर्ने अभियान आगामी सरकारको प्राथमिकतामा पर्ने मन्त्री कार्कीको भनाइ छ ।
सुनसरी क्षेत्र नं. ४ बाट प्रतिनिधि सभा सदस्यमा नवनिर्वाचित हुनुभएका नेपाल सरकारका प्रवक्ता कार्कीले सुनसरीको वराहक्षेत्र नगरपालिका वडा नम्बर ७ स्थित सप्तकोसी बहुमुखी क्याम्पसको १२औँ वार्षिकोत्सव कार्यक्रममा बोल्दै सो भनाइ राखेका हुन ।
नेपाली कांग्रेसका नेतासमेत रहनुभएका मन्त्री कार्कीले आगामी सरकार कांग्रेस नेतृत्वमा वर्तमान सत्तारुढ लोकतान्त्रिक बाम गठबन्धनकै बन्ने उल्लेख गरे ।
आफू लोकतान्त्रिक बाम गठबन्धनबाट विजयी भए पनि सबैको साझा जनप्रतिनिधिको रूपमा काम गर्ने बताए।
मुलुकको विकासका लागि पर्यटन, ऊर्जा, उद्योग, कृषिसहित सूचना प्रविधिको समेत महत्त्वपूर्ण भूमिका हुने उनको भनाइ छ ।
उहाँले शिक्षाको विकास र विस्तारका लागि सूचना तथा प्रविधिको प्रयोगमा जोड दिनुपर्ने बताए ।
सुनसरी ४ बाट सर्वसाधारणले आफूलाई दोस्रो पटक विजय गराएको बताउनुहुँदै मन्त्री कार्कीले आफ्नो निर्वाचन क्षेत्रमा विगत पाँच वर्षमा शिक्षा, स्वास्थ्य, विद्युत्, भौतिक विकास गरेको र आगामी दिनमा पनि सर्वसाधारणको अपेक्षा अनुरूप गरिबी निवारण र रोजगारी सिर्जना अभियानमा काम गर्ने प्रतिविद्धतासमेत व्यक्त गरे ।
