धनगढी, 8 मे 2020/ हिम शाह
सेती प्रादेशिक अस्पतालमा उपचाररत धनगढी की कोरोना संक्रमित महिला पनि डिस्चार्ज भएकी छन्। लगातार दुई पटक रिपोर्ट नेगेटिभ आएपछि उनलाई आज अस्पतालबाट डिस्चार्ज गरिएको हो। 35 दिनदेखि सेती अस्पतालमा उपचार गरारहेकी धनगढी उप–महानगरपालिका वडा नम्बर 5 की 34 वर्षीया महिलाको सुरूआतका 6 वटा थ्रोट स्वाब परीक्षणमा कोरोना रिपोर्ट पोजेटिभ आएको थियो, भने पछिल्लो 2 पटक गरिएको परीक्षणमा रिपोर्ट नेगेटिभ आएको हो।
लगातार दुई पटकसम्म रिपोर्ट नेगेटिभ आएपछि उनलाई अस्पतालबाट डिस्चार्ज गरिएको सेती प्रादेशिक अस्पतालका कोरोना रोग उपचार विभाग प्रमुख शेरबहादुर कमरले बताउनुभयो। यससँगै सूदुरपश्चिमका सबै 5 जना कोरोना संक्रमितले कोरोना विरूद्धको लडाई जितेर घर घर्किएका छन्।
यसअघि 4 जना संक्रमितहरू कोरोना भाइरसबाट सन्चो भएर घर फर्किसकेका छन्। लम्कीचुहा नगरपालिकाका 21 वर्षीय युवक, धनगढी उप–महानगरपालिका वडा नम्बर 5 का 34 वर्षीय युवक, कञ्चनपुरको बेदकोट नगरपालिकाका 40 वर्षीय पुरुष र लम्कीचुहा नगरपालिका वडा नम्बर 1 की महिला यसअघि नै सेती प्रादेशिक अस्पतालबाट डिस्चार्ज भईसकेका थिए।
