दार्जीलिङ, 23 जनवरी 2020
पश्चिम बंगालकी मुख्यमन्त्री ममता बनर्जीले आफु हिन्दु भएपनि सबै धर्मलाई अनुसरण गर्ने गरेको बताउनु भएको छ। दार्जीलिङको मलमा आयोजित नेताजी सुभाष चन्द्र बोसको जन्मजयन्तीका अवसरमा आयोजित समारोहमा बोल्दै मुख्यमन्त्री बनर्जीले 12 मई 1940 मा बंगालको झाडग्राममा नेताजीले गरेको सम्बोधन स्मरण गर्दै उहाँले धर्म केवल चुनावी प्रयोगका लागी हुने भएकाले यसलाई समर्थन नगर्न भनेको बताउनु भयो। उहाँले हिन्दु धर्म केवल एक व्यक्तिका लागी नभएको भन्दै स्वामी विवेकानन्दले सँधै हिन्दु धर्म सबैका लागी भएको भन्ने कुरा सँधै भन्ने गरेको बताउनुभयो । मुख्यमन्त्रीले आफु हिन्दु भए पनि आफुले सबै धर्मको पर्वहरु मनाउने गरेको बताउनुभयो । उहाँले देशका जनता र उनिहरुको धर्मलाई माया गर्ने व्यक्ति नेता हुने समेत बताउनुभयो।
उहाँले नेताजी राष्ट्रिय नेता भए पनि उहाँलाई राष्ट्रिय रुपमा सम्मान नपाइएकोमा दुखेसो पोख्नुभयो । नेताजीको जन्मजयन्तीका अवसरमा राज्य विदा हुने गरेको भएपनि आजसम्म राष्ट्रिय विदा भने दिइने नगरेको बताउनुभयो । आफु सत्तामा आएपछि राष्ट्रिय विदाका लागि फाईल बढाए पनि केही नभएको बताउनुभयो । उहाँले नेताजीको जन्मजयन्तिका बारेमा सबैलाई थाहा भएपनि पूण्यतिथीबारे कसैलाई थाहा नभएको बताउनुभयो। उहाँले नेताजीले तिमी मलाई रगत देऊ म तिमीलाई मुक्ती दिन्छु भन्ने नारा दिएको तर बी.जे.पी.-ले केवल रगत चुस्ने राजनीति गरिरहेको बताउनुभयो।
मुख्यमन्त्रीले NRC, CAA र NPR विरुद्ध देशव्यापी आन्दोलनमा मानिसहरुले आफ्नो रगत दिइरहेको समेत बताउनु भयो। उहाँले नेताजी खर्साङमा बस्नुका साथै उहाँले दार्जीलिङलाई माया गर्नुभएकोले आफु सरकारमा आएदेखि नेताजीको जन्मजयन्ती दार्जीलिङमा मनाउने गरेको बताउनुभयो ।
