नयाँ दिल्ली/ 2 जनवरी 2020
नयाँ वर्षको उत्साहसँगै वर्षको पहिलो दिन हिजो राजधानी दिल्लीमा ट्राफिक व्यवस्था पूर्णरुपमा प्रभावित बन्यो । दिल्लीका प्रमुख पर्यटकीय स्थलहरुमा घुम्न आउनेको संख्या एक्कासी बढ्दा पुलिसलाई ट्राफिक व्यवस्थापन गर्न निकै कठीनाई भएको थियो । दिल्लीमा नयाँ वर्षको पहिलो दिन 5 लाख 50 हजार पर्यटकहरु विभिन्न पर्यटकीय स्थलहरुमा पुगेका थिए । यो संख्या 2019 को नयाँ वर्षभन्दा 30 प्रतिशतले बढि हो । पर्यटकहरुको चापका कारण सडक यातायात सुस्त भएको थियो भने 5 मेट्रो स्टेशनहरुमा आवाजाही बन्द गर्नु परेको थियो । दिल्लीका प्राय सबै सडकहरु करिब 6 घण्टा प्रभावित रहेका थिए भने दैनिक यात्रुहरु जामका कारण निकै प्रभावित बनेका थिए ।
दिल्लीका कनाट प्लेस, इण्डिया गेट, चिडीयाखाना, वेस्ट टु वण्डर पार्क, प्रेस इन्कलेव रोडस्थित मल माइन, अक्षरधाम मन्दिर, बंगला साहीब गुरुद्वारा र जमुना बजारको हनुमान मन्दिरमा पर्यटकहरुको ताँती लागेको थियो ।
