काठमाडौं, 7 अक्टूबर 2022
निर्वाचन आयोगले प्रतिनिधिसभाको १६५ वटै निर्वाचन क्षेत्रमा निर्वाचन अधिकृतको कार्यालय स्थापनाको काम सकिएको जनाएको छ । असोज २१ गते बिहीबारसम्म निर्वाचन आयोगले तोकेको समयसीमा भित्र प्रतिनिधिसभातर्फका १६५ वटै क्षेत्रमा निर्वाचन अधिकृतको कार्यालय स्थापना भइसकेको जनाएको हो । शुक्रबार न्युज एजेन्सी नेपालसँग कुरा गर्दै निर्वाचन आयोगका सह–प्रवक्ता सूर्यप्रसाद अर्यालले स्थापना भएका कार्यालयहरुमा जनशक्ति र आवश्यक व्यवस्थापकीय कामहरू पनि पूरा भएको बताए । स्थापना भएका निर्वाचन अधिकृतको कार्यालयमा शुक्रबार र शनिबारको समय असोज २३ गते हुने प्रतिनिधि र प्रदेशसभाको प्रत्यक्षतर्फको उमेदवारी मनोनयनका लागि तयारीको समय रहेको बताए । निर्वाचन अधिकृतले आफ्नो मातहतबाट तीनवटा निर्वाचन क्षेत्रको उमेदवारी संकलन गर्नुपर्ने बताए । सह–प्रवक्ता अर्यालले निर्वाचन अधिकृतहरुले प्रतिनिधिसभाको लागि छुट्टै कक्ष र प्रदेशसभाको १ को लागि छुट्टै र २ का लागि छुट्टै गरेर तीनवटा ठाउँमा तोकिएको समयभित्र दर्ताको व्यवस्था मिलाइने बताए । सह–प्रवक्ता अर्यालले आयोगले प्रत्यक्षतर्फको दल दर्ताका लागि व्यवस्थित गर्न अहिलेको आचारसंहीताले सहज बनाएको बताए । उनले विगतमा हुने तामझाम र बाजागाजासहितको प्रचलनलाई अन्त्य गरी २५ जना मात्रै उपस्थित हुन पाउने प्रावधानले दल दर्ताका लागि केही सहज बनाएको बताए ।
