काठमाडौं, 13 नवम्बर 2021
नेकपा एकीकृत समाजवादीको केन्द्रीय कमिटी बैठक शनिबारबाट काठमाडौंमा सुरु भएको छ । ललितपुरको एक होटलमा बसेको बैठकको पहिलो दिन केन्द्रीय अनुशासन आयोग, लेखा आयोग र निर्वाचन आयोगका पदाधिकारीलाई शपथ गराइएको थियो । त्यस्तै बैठकमा पार्टी अध्यक्ष माधव कुमार नेपालले सम्बोधन गर्नुभएको थियो । सो क्रममा उहाले खर्चिलो निर्वाचन प्रणाली परिवर्तन गर्नुपर्ने बताउनुभएको थियो । त्यस्तै अध्यक्ष नेपालले राष्ट्रिय आत्मसमर्पणवादबाट देशलाई जोगाउने काम गरेको उल्लेख गर्नुभयो । त्यस्तै बैठकमा सम्मानित नेता झलनाथ खनालले बैचारिक राजनीतिक प्रतिवेदन पेश गर्नुभएको थियो । सो क्रममा नेता खनालले जनताको बहुदलीय जनवाद (जबज) अब पार्टीको मार्गदर्शन सिद्धान्त बन्न नसक्ने बताउनुभयो । उहाले एमालेबाट समाजवादी क्रान्ति पूरा हुन नसक्ने भएपछि आफूहरुले नयाँ पार्टी खोलेको तर्क गर्नुभयो । आफूहरु फुटेको नभइ व्यक्तिवादी प्रवृत्तिविरुद्ध विद्रोह गरेको दावी गर्दै खनालले समाजवादी क्रान्तिको नेतृत्व एकीकृत समाजवादीले मात्रै गर्नसक्ने धारणा राख्नुभयो । उहाले एमालेका एक पङ्ती अझै पनि अन्यौलमा रहेकाले आफ्नो पार्टीमा आउने संभावना दखेको दावी गर्नुभयो । बैठकमा प्रदेश १ का मुख्यमन्त्री राजेन्द्र कुमार राई र बागमती प्रदेशका मुख्यमन्त्री राजेन्द्र पाण्डेले प्रदेश सरकारको भावी योजनाका बारमा जानकारी गराउनुभएको प्रचार बिभाग प्रमुख जगन्नाथ खतिवडाले जानकारी दिनुभयो । बैठकमा आइतबार केन्द्रीय सचिवालय र कार्यालयहरूबाट भएका काम कारबाहीहरू अनुमोदन हुने कार्यक्रम छ । बिभिन्न प्रस्ताव पारित गर्दै बैठक आइतबार नै सम्पन्न हुने समाजवादीले जनाएको छ ।
