चितवन,30 नवम्बर 2021

नेकपा (एमाले) को १०औँ राष्ट्रिय महाधिवेशन अन्तर्गत मतदान प्रक्रिया सम्पन्न भएको छ । नयाँ नेतृत्वका लागि भएको निर्वाचनमा दुईहजार ९२ मत खसेको छ । एमालेको महाधिवेशन प्रतिनिधि दुई हजार १ सय ५३ छन् । विद्युतीय प्रविधिबाट गरिएको मतदानको नतिजा छिटै आउने सो पार्टीको निर्वाचन आयोगले जनाएको छ ।  पदाधिकारि तर्फ अध्यक्ष, उपाध्यक्ष र सचिवमा निर्वाचन भएको हो । त्यस्तै, केन्द्रीय समिति तर्फ खुला केन्द्रीय सदस्य, प्रदेश १ (भौगोलिक क्षेत्र) खुला, प्रदेश १ महिला, समावेशी क्षेत्रको दलित खुला, थारू खुला, पिछडिएको क्षेत्र र सुदूर प्रदेशको महिला तर्फ निर्वाचन भएको छ । अरू सबै पदमा सर्वसम्मत भएको थियो  । अध्यक्ष पदका लागि केपी शर्मा ओली र भीम रावल गरी दुई जनाले उम्मेदवारी दिनुभएको थियो ।  ६ जना उपाध्यक्षका लागि सात जना र सात जना सचिव पदका लागि नौ जनाको प्रतिस्पर्धा भएको छ । उपाध्यक्षमा युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा सुवास नेङ्वाङ, विष्णु पौडेल र घनश्याम भुसालको उम्मेदवारी छ । यस्तै सचिवमा टोपबहादुर रायमाझी, रघुवीर महासेठ, छविलाल विश्वकर्मा, लेखराज भट्ट, योगेश भट्टराई, गोकर्ण विष्ट, पद्यमा अर्याल, भीम आचार्य र टंक कार्कीको उम्मेदवारी परेको थियो । केन्द्रीय समितिमा ८४ जना खुला केन्द्रीय सदस्यका लागि १ सय जनाको उम्मेदवारी परेको थियो । प्रदेश १ (भौगोलिक क्षेत्र) खुलातर्फ ६ सदस्यका लागि सात जनाले उम्मेद्वारी दिएका छन्, भने प्रदेश १ महिलामा तीन सदस्यका लागि चार जनाको उम्मेदवारी परेको आयोगले जनाएको छ । महाधिवेशनले ३०१ सदस्सिय केन्द्रियसमिति चयन गर्दै छ । महाधिवेशनको उद्घाटन सत्र यही मङ्सिर १० गते नारायणगढको नारायणी नदी किनारमा भएको थियो भने बन्द सत्र सौराहामा भएको हो ।