नेपालमा इन्डियन रेल आउँछ भने चाइनिज रेलपनि आओस्: पन्त
काठमाडौं, 19 जुन 2023
नेकपा (एमाले)का सांसद रघुजी पन्तले नेपालमा इन्डियन रेल आउँछ भने चाइनिज रेलपनि ल्याउन आग्रह गरेका छन्। सांसद पन्तले नेपालमा इन्डियन रेल आउँछ भने चाइनिज रेलपनि ल्याउन आग्रह गरेका हुन्। सोमबार प्रतिनिधिसभाको बैठकमा बोल्दै उनले यस्तो आग्रह गरे।
पन्तले चीनतर्फको बाटो खोल्नुपर्ने बताए ।
उनले भने,‘१० हजार मेगावाट जलविद्युत भारतलाई बेच्ने भनेका छौं। देशभित्र विद्युत पुर्याउन सकेका छैनौं। चाइनासँगको कनेक्टिभिटिको बाटो खोल्नुहोस्,रेल ल्याउनुहोस्। नेपालमा इन्डियन रेल आउँछ भने चाइनिज रेलपनि आओस् न, के बिग्रियो र? इण्डियामा विद्युत बेच्छौं भने चीनमा पनि विद्युत बेचौं न त्यसले त झन् नेपालको राष्ट्रिय स्वार्थ झन् बलियो बनाउँछ। प्रधानमन्त्रीको भारत भ्रमणपछि नेपालको परराष्ट्र नीति डिरेल भएको जस्तो लाग्यो। बाटो बिराउन खोजेको जस्तो देखियो।’
सांसद् पन्तले देशहरुको आ-आफ्नै स्वार्थ हुने भएकाले आफ्नो राष्ट्रिय स्वार्थको बारेमा बोल्न हिच्किचाउन नहुने बताएका हुन् ।
पन्तले भने,‘देशहरुको हृदय हुँदैन । देशहरुको स्वार्थ मात्रै हुन्छ । भारतले मौका मिल्दा ठोक्ने नै हो । भारतले हामीलाई दबाउने नै हो । दवाउने नीति विरुद्ध हामीले हाम्रो राष्ट्रिय स्वतन्त्रतालाई अक्षुण राख्न सक्नुपर्छ । संसारका ठूला शक्ति देशका बीचमा हामी छौं । यी दुईवटै देशका बीचमा नेपालको व्यापारिक सम्बन्ध बढिरहेको छ । तर,अरु सम्बन्ध राम्रो छैन । नेपालमा चीन नआओस् भन्ने भारतको आसय छ । त्यसलाई नेपालले स्वीकार्न सक्दैन ।’
