काठमाण्डौँ, 6 मे 2020
नेपालमा कोरोना संक्रमितको संख्या 99 पुगेको छ। बुधबार पर्साका 17 जनामा संक्रमण पोजेटिभ देखिएसँगै नेपालमा संक्रमितको संख्या 99 पुगेको हो। स्वास्थ्य तथा जनसंख्या मन्त्रालयका अनुसार बुधबार राष्ट्रिय परीक्षण प्रयोशालामा परीक्षण भएका नमुना मध्ये 17 वटा पोजेटिभ देखिएका छन्। 2 महिने शिशुदेखि 66 वर्ष उमेर समूहका व्यक्तिमा संक्रमण पोजेटिभ देखिएको हो। मन्त्रालय प्रवक्ता डा. विकास देवकोटाका अनुसार 10 जना पुरुष र 7 जना महिलाको नमुना पोजेटिभ आएको हो।
यसैगरी बैशाख 11 र 14 गते उपचारपछि निको भएर डिस्चार्ज भएका 3 जनामा पुनः परीक्षण गर्दा पोजेटिभ देखिएको छ। उनीहरुलाई उपचारका लागि अस्पताल भर्ना गरिएको छ। मन्त्रालयका अनुसार कोशी अस्पतालमा उपचाररत 6 जना निको भएर घर फर्किएका छन्। अहिले उपत्यकामा 7 र बाहिर 129 गरी 136 जना संकास्पद व्यक्ति आइसोलेसनमा उपचाररत रहेका छन। देशभरी 19 हजार 734 जना क्वारेन्टिनमा रहेका छन्।
मन्त्रालय प्रवक्ता डा. विकास देवकोटाका अनुसार अहिलेसम्म पीसीआर विधिबाट 14 हजार 96 परीक्षण भएको छ। यस्तै आरडीटी विधिबाट 52 हजार 9 सय 70 जनाको परीक्षण भएको छ। पछिल्लो 24 घण्टामा भने 9 सय 91 जनाको मात्रै परीक्षण भएको छ।
