काठमाडौं, 28 दिसम्बर 2021
नेपाली राष्ट्रिय क्रिकेट टिमका मुख्य प्रशिक्षक पुबुदु दशानायके दोस्रो कार्यकालका लागि नेपाल आउनुभएको छ । पुबुदुलाई नेपाल क्रिकेट संघ (क्यान) का पदाधिकारीले स्वागत गरेका थिए । नेपाल आएपछि विमानस्थलमा सञ्चारकर्मीसंग कुरा गर्दै पुबुदुले अहिलेको क्रिकेटको अवस्था निकै फरक रहेको र यसअघि २०११ मा आउँने बेला भन्दा अहिले धेरै चुनौती रहेको बताउनुभयो । उहाले जस्तोसुकै चूनौतिको सामना गर्न पनि आफु तयार रहेको बताउनुभयो । खुल्ला आवेदनबाट छनोट भएका पुबुदुले फेरी नेपाल आउँदा निकै खुसी भएको पनि बताउनुभयो । पहिलो जस्तै यसपटक पनि नेपाली क्रिकेट अर्को स्तरमा पुर्याउन चाहेको भन्दै उहाले त्यही अनुसार नेपालले आफुलाई परिवर्तन गुर्नपर्ने धारणा राख्नुभयो ।क्यानको मंसिर २५ गतेको बोर्ड बैठकले मुख्य प्रशिक्षकको रुपमा पुबुदुलाई अनुमोदन गरेको थियो । यस अघि दासानायके सन् २०११ देखि २०१५ सम्म नेपालका मुख्य प्रशिक्षकको रुपमा रहनुभएको थियो । उहाकै प्रशिक्षणमा नेपालले पहिलो पटक सन् २०१४ मा आईसीसी टी–ट्वान्टी विश्वकप खेलेको थियो । मुख्य प्रशिक्षक डेव ह्वाटमोरले राजीनामा दिएपछि नेपाली टिम मुख्य प्रशिक्षक विहिन रहेको थियो । ओमानमा भएको आईसीसी विश्वकप क्रिकेट लिग–२ को त्रिकोणात्मक एकदिवसीय सिरिजपछि ह्वाटमोरले राजीनामा दिएका थिए ।
