काठमाण्डौँ, 7 फरवरी 2020
नोवल कोरोना भाइरससँग जुधिरहेको चीनलाई नेपाल सरकारले 1 लाख थान प्रोटेक्टिभ मास्क सहयोग गरेको छ। सरकारको निर्णय अनुसार शुक्रबार परराष्ट्रमन्त्री प्रदिप कुमार ज्ञवाली र स्वास्थ्य तथा जनसंख्यामन्त्री भानुभक्त ढकालले चिनियाँ राजदुत होउ यान्छीलाई मास्क हस्तान्तरण गर्नुभएको हो। चीनमा नोवल कोरोना भाइरसको संक्रमणबाट जोगाउने मास्कको अत्याधिक माग भएपछि नेपाल सरकारले मास्क सहयोग गर्ने निर्णय गरेको थियो।
परराष्ट्र मन्त्रालयमा आयोजित सहयोग सामाग्री हस्तान्तरण कार्यक्रममा नेपालका लागि चिनियाँ राजदूत होउ यान्छीले कोरोना भाइरसको संक्रमणमा नेपाललगायत अन्तर्राष्ट्रिय समुदायबाट प्राप्त सहयोग र एकता चीनका लागि महत्वपूर्ण भएको बताउनुभयो। उहाँले यसबाट चिनियाँ नागरिक र नेतृत्वलाई थप उर्जा मिलेको समेत बताउनुभयो।
बिहिबार प्रधानमन्त्री, उपप्रधानमन्त्री, मन्त्री, सचिवहरुलगायत सुरक्षा निकायका प्रमुखसहितको बैठकले नोवल कोरोना भाइरसँग जुधिरहेको चीनलाई 1 लाखको संख्यामा प्रोटेक्टिभ मास्क सहयोग गर्ने निर्णय गरेको थियो।
