काठमाडौं , २१ जनवरी २०२०
सरकारले प्रतिबन्ध गरेको नेत्र विक्रम चन्द विप्लव नेतृत्वको नेपाल कम्युनिष्ट पार्टीभित्रका दुई तथ्य फेला परेको छ ।
सरकार आक्रामक हुँदै नेता कार्यकर्तामाथि कारबाही र पक्राउमा उत्रिनु र प्रभावशाली मानिएका नेता नै पार्टी छाडी सत्तारुढ नेकपामा प्रवेश गर्नुले प्रतिबन्धित पार्टीभित्र भुइँचालो गएको छ ।
प्रतिबन्धित पार्टीका नेता कार्यकर्ताले सत्तारुढ नेकपा अध्यक्ष पुष्पकमल दाहाल प्रचण्डमार्फत सेफल्यान्डिङका विषयमा कुरा चलाइरहेका छन् । तर, प्रचण्ड कुनै पनि हालतमा विप्लवकै नेतृत्वमा पार्टी समाहित हुनुपर्छ भन्ने सन्देश दिइरहेका छन् ।
उक्त पार्टीका प्रवक्ता खड्गबहादुर विश्वकर्मा प्रकाण्ड सत्तारुढ नेकपामा प्रवेश गर्नका लागि तयार रहेका छन् भने विप्लवले तत्काल आत्मसमर्पण नगर्ने बताउँदै आएका छन् ।
प्रभावशाली नेता र कार्यकर्ता पक्राउ गरेपछि विप्लव समूह कमजोर भएको मुल्यांकन विभिन्न चरणमा हुन थालेको छ । उक्त कमजोर समूहभित्र पनि प्रकाण्ड बहुमतमा रहेको स्रोतले जनाएको छ । विप्लव समूहलाई नेकपामा प्रवेश गराउनका लागि प्रचण्डले वार्ता जारी राखेका छन् । बहुमत सदस्य नेकपामा ल्याउन प्रकाण्ड तयार छन् तर प्रचण्ड उनलाई विश्वास गर्दैनन् ।
सरकारले उक्त पार्टीलाई प्रतिबन्ध गर्नुअघि प्रचण्डलाई नै ज्यान मार्न सक्ने खतरा रहेको कारणलाई अगाडि सारेको थियो । उक्त समूहभित्र प्रकाण्डकै नेतृत्वमा त्यस्तो निर्णय भएको बताइन्छ । त्यसै कारण पनि प्रकाण्ड र विप्लवबीच मनमुटाव रहेको स्रोतको दाबी छ ।
हिंसात्मक गतिविधिमा सक्रिय भएपछि सरकारले विप्लव समूहमाथि पक्राउ र कारबाहीको श्रृङ्खला अगाडि बढायो । यो क्रममा प्रहरी इन्काउन्टरमा कुमार पौडेल मारिए भने अन्य कार्यकर्ता पनि मुठभेडमा मारिएका थिए ।
