काठमाडौं, 22 दिसम्बर 2022
अर्थमन्त्री एवं नेकपा माओवादी केन्द्रका नवनिर्वाचित सांसद जनार्दन शर्माले पार्टी अध्यक्ष पुष्पकमल दाहाल प्रचण्डकै नेतृत्वमा नयाँ सरकार बन्नुपर्ने र बन्ने बताएका छन्। सांसदको शपथ लिन बिहीबार संघीय संसद् भवन पुगेका शर्माले सञ्चारकर्मीसँगको कुराकानीमा प्रचण्डकै नेतृत्वमा सरकार बन्नुपर्ने बताएका हुन्।
‘माधव नेपाल अस्पतालबाट डिस्चार्ज भएपछि बस्ने गठबन्धन बैठकले को प्रधानमन्त्री वा राष्ट्रपति बन्ने निर्णय गर्छ। अध्यक्ष प्रचण्ड पहिलो पालोमा प्रधानमन्त्री बन्नुपर्छ मेरो सुझाव छ। यद्यपि गठबन्धनबाट को बन्छ, पछि थाहा होला,’ उनले भने।
नयाँ राष्ट्रपति राजनीतिक नेतृत्वबाटै बन्नुपर्ने गरी गठबन्धन दलबीच छलफल र सहमति भइसकेको उनको भनाइ छ। राष्ट्रपतिमा कांग्रेस वरिष्ठ नेता रामचन्द्र पौडेल वा माधव नेपालमध्ये एक जना हुन सक्ने शर्माको दाबी छ।
