काठमाण्डौ, 21 मे 2021
नेकपा (एमाले)का अध्यक्ष एवं प्रधानमन्त्री केपी शर्मा ओलीले पुनः प्रधानमन्त्रीमा दाबी गर्नु भएको छ । विपक्षी गठबन्धनले आफुसँग 149 सांसदहरुको समर्थन रहेको दावी गरिरहेका बेला प्रधानमन्त्री ओलीले आफ्नो साथमा 153 जना सांसदहरुको समर्थन रहेको दावी गर्दै शुक्रबार राष्ट्रपति कार्यालय शीतलनिवास पुगेर उहाँले प्रधानमन्त्रीमा दाबी गर्नु भएको हो ।
राष्ट्रपतिले संविधानको धारा ७६ (५) अनुसार प्रधानमन्त्रीमा दाबी गर्न शुक्रबार साँझ ५ बजेसम्मको समय दिएकोमा उहाँले दिउँसो शीतल निवास पुगेर दाबी गर्नु भएको उहाँका मुख्य सल्लाहकार विष्णु रिमालले जानकारी दिनु भएको छ । ओलीले १५३ जना सांसद्को हस्ताक्षर बुझाएको दाबी रिमालले गर्नु भएको छ । एमालेका १२१ र जसपाका ३२ जना सांसद्को समर्थन आफूलाई रहेको दाबी ओलीले गरेको उहाँले बताउनु भयो ।
