काठमाडौं, 12 अक्टूबर 2022
नेकपा एमालेका महासचिव शंकर पोखरेलले प्रभु साहले अराजनीतिक षड्यन्त्र गरेको आरोप लगाएका छन् । बुधबार सामाजिक सञ्जालमार्फत महासचिव पोखरेलले साहले पार्टीलाई धोका दिएर स्वतन्त्र उम्मेदवारी दिएको बताएका हुन् । बुधवार फेसबूकमा एक स्टाटस लेख्दै महासचिव पोखरेलले साहले पार्टीकै निर्णय अनुसार रौतहटको टिकट लिएको र अन्तिम समयमा आएर एमालेलाई धोका दिँदै स्वतन्त्र उम्मेदवारी दिएको बताएका छन् ।
पोखरेलले लेखे, ‘प्रभु साह जसपासँगको तालमेलको सम्झौता बैठकमा सहभागी हुनु भो ।उक्त सहमतिपश्चात मधेस प्रदेशमा उम्मेदवार टुंगो लगाउने छलफलमा बस्नु भो । निर्णयभएर अनुसार रौतहटको टिकट पनि लिएर जानु भो । तर पार्टीलाई धोका दिएर अन्तिम समयमा आफूले स्वतन्त्र उम्मेदवारी दिनु भो र अन्य क्षेत्रका उम्मेदवारको टिकटसमेत नदिकन समय गुजार्ने षडयन्त्र गर्नु भो । राजनीतिमा यस प्रकारको षडयन्त्रलाई असहमतिको जामा लगाउनुको कुनै अर्थ छैन । यस प्रकारको छलछाम गठबन्धनका नेतासँगको षडयन्त्रपूर्ण साँठगाँठ नै हो । रौतहटका जनताले यस षडयन्त्रलाई राम्ररी नै बुझेका छन् । मधेस प्रदेशमा नेकपा(एमाले) र जसपाबीचमा भएको सहकार्य र तालमेललाई पूर्ण रूपमा सफल बनाऔँ ।‘
महासचिव पोखरेलले राजनीतिमा यस प्रकारको षडयन्त्रलाई असहमतीको जामा लगाउनुको कुनै अर्थ नहुने समेत बताएका छन् । साथै यो सत्ता गठबन्धनमा रहेका दलहरूसँगको षडयन्त्रपूर्ण साँठगाँठ भएको समेत उल्लेख गरेका छन् । महासचिव पोखरेलले लेखेका छन्,‘यस प्रकारको छलछाम गठवन्धनका नेतासंगको षडयन्त्रपूर्ण साठगाँठ नै हो । रौतहटका जनताले यस षडयन्त्रलाई राम्ररी नै वुझेका छन् ।’
मधेस प्रदेशमा नेकपा ‘एमाले’ र जसपाबीचमा भएको सहकार्य र तालमेललाई पूर्ण रुपमा सफल बनाउन समेत महासचिव पोखरेलले आह्वान गरेका छन् ।
