दिल्ली, 5 अक्टुबर 2021
फ्रान्सका चर्चमा लगभग ७० वर्षयता २ लाख भन्दा बढि बालबालिकाहरु क्याथोलिक पादरीहरुबाट यौन शोषणमा परेको तथ्य खुलासा भएको छ । एक रिपोर्टका अनुसार फ्रेन्च पादरीहरुले लगभग ७० वर्षको अवधिमा २ लाखभन्दा बढि बालबालिकाहरुमाथि यौन शोषण गरेको तथ्य खुलासा भएको हो । १९५० देखि २०२० सम्म २ लाख १६ हजार बालबालिकाहरु यौन शोषणमा परेको बताइएको छ । चर्चका पादरीभन्दा अन्य व्यक्तिहरुबाट पनि शोषणमा परेकाहरुको संख्या भने यो भन्दा धेरै रहेको रिपोर्टमा छ । चर्चसँग सम्बन्ध भएका पादरी बाहेकका व्यक्तिहरु समेतबाट पीडित भएकाहरुको संख्या झण्डै ३ लाख रहेको बताइएको छ । चर्चहरुमा हुने यौन शोषणबारे निगरानी गर्ने निकाय ‘इन्डिपेन्डेन्ट कमिसन अन सेक्सुअल एब्युज इन चर्च’ले सो रिपोर्ट सार्वजनिक गरेको हो । आयोगका अध्यक्ष जीन मार्क सौभेका अनुसार सो अवधिमा २ हजार ९ सयदेखि ३ हजार २ सय पादरीहरुले विभिन्न चर्चहरुमा पादरीको रुपमा काम गरेका थिए।
