बेङ्गलोर, 10 सेप्टेम्बर
दक्षिण भारतको कर्नाटक राज्यको बेङ्गलोरमा एक नेपालीले आत्महत्या गरेका छन । रोजगारीको सिलसिलामा बेङ्गलोरमा पछिल्लो 1 वर्षदेखि रहँदै आएका सुर्खेत पञ्चपुरी नगरपालिका वार्ड नम्बर 8 का बिमल मगरले आत्महत्या गरेका हुन । छवि मगरका छोरा बिमल मगर श्रीमतिसहित बेङ्गलोरको पणतुरमा बस्दै आएका थिए । अखिल भारत नेपाली एकता मञ्चका केन्द्रीय सचिवालय सदस्य राकेश ओडका अनुसार बिमल मगर पणतुरमै सिक्योरिटी गार्डका रुपमा काम गर्दै आएका थिए । बिमलले घरायसी कलहका कारण आत्महत्या गरेको आशंका गरिएको राकेश ओडले बताउनु भएको छ । जानकारीका अनुसार बिमल र उनकी पत्नीबिच प्राय झगडा भएको हुने गर्दथ्यो । पछिल्लो केही दिनदेखि बिमल नियमित रुपमा मदिरा सेवन गर्ने गरेका थिए । यस्तै तनावका कारण उनले आत्महत्या गरेको हुनसक्ने अनुमान गरिएको छ । बेङ्गलोरमा नेपालीले आत्महत्या गरेको यो पहिलो घटना होइन, यसअघि पनि कयौ नेपालीले आत्महत्या गरिसकेको नेशनल लाईभका संवाददाता मिनेष रावलले बताउनु भएको छ ।
दक्षिण भारतमा पछिल्लो समय नेपालीहरुले आत्महत्या गरेको घटना लगातार प्रकाशमा आइरहेको छ । पछिल्लो समय तमीलनाडु राज्यमा 6 महिनामा 9 जनाले आत्महत्या गरिसकेका छन ।
