कैलाली , १७ जनवरी २०२०
भन्सार नतिरी सामाग्रीहरु ल्याउनेको मात्रा बढ्दै गरेको भन्दै व्यापारीहरुको गुनासो रहेको छ । त्यसलाई रोक्न भन्सार कार्यालयले विशेष चासो नदिएको व्यापारीहरुले बताएका छन् । भारतीय नाकाबाट मोटरसाइकल, रिक्सा तथा साइकलमा भन्सार छलेर सामाग्रीहरु ल्याउने क्रम बढीरहेको छ ।
व्यवसायी महासंघका अध्यक्ष नरेश कटुवालले घरायसी प्रयोजनका लागि भन्दै भारतबाट ल्याएर तराई क्षेत्रमा व्यापार भइरहेको बताए । भारतीय नाकाहरुको अवस्थाबारे बुझ्न विभिन्न नाकाहरु पुगेर फर्किएका अध्यक्ष कटुवालले भन्सार छल्नेको संख्या ठूलो रहेको बताए ।
भन्सार नतिरी सामाग्री ल्याउनेहरुका कारण कर तिरेर वैधानिक तरिकाले व्यवसाय गर्नेहरुलाईमात्रै नभएर राज्यलाई समेत समस्या परेको छ । चेक पोष्टमा कार्यरत सशस्त्र प्रहरीले रिक्सा, मोटरसाइकल, साइकल लगायतमा सामान ल्याउदा धेरै ध्यान नदिएको गुनासो गरे ।
सरकारले भारतीय बजारबाट सानो परिमाणमा घरायसी सामान ल्याउन छुट दिएको छ । त्यसैलाई टेक्दै स्थानीय व्यापारीहरुले घरायसी सामान भन्दै व्यापारिक सामाग्रीहरु भन्सार नतिरी नेपाल भित्र्याउने गरेको पाइएको छ ।
भन्सार विभागले भने भन्सार नतिरी ल्याएको भेटाएमा कारबाही हुने बताएका छन् । थोरै परिमाणमा भए बिगो जफत र सोहि बराबरको जरिवानासम्मको कारबाही हुने विभागका निर्देशकले बताएका छन् ।
